Şifa Barzanî, Serpereştiyarê Giştî yê Revenda Kurdistanî li Baregeha Barzanî, peyameke germ a pîrozbahiyê şand Dr. Ronî Beha Mayî bi boneya bi destxistina Xelata Bijîşka Herî Baş a Rûsyayê û dahênana wî ya mezin di warê bijîşkiya mêjiyê zarokan de.
Di peyamê de ev destkefta zanistî wekî cihê serbilindiyeke mezin ji bo gelê Kurd û bi taybetî ji bo Revenda Kurdistanî ya li derveyî welat hate nirxandin.
Dr. Ronî Beha Mayî bijîşkekî Kurd e ji Rojavayê Kurdistanê, li ser asta welatekî mezin wek Rûsyayê serkeftiye ku bibe navenda baldariya navendên zanistî û bijîşkî. Bi dahênana rêbazeke nû ji bo dermankirina nexweşiyên giran ên mêjiyê zarokan, ne tenê xizmeteke mezin ji mirovahiyê re kiriye, lê her weha navê Kurdan li qada navneteweyî bilind girtiye. Baregeha Barzanî, bi rêya Nivîsîngeha Diyasporayê, her dem piştgiriya û nirxandina wan kesên ku li derveyî welat di warê zanistê de pêşeng in û serkeftinên mezin bi dest tînin, radiweste.
Naveroka peyamê pîrozbahiyê wiha ye:
Ji bo: Birêz Dr. Ronî Beha Mayî
Bi boneya bidestxistina xelata “Baştirîn Bijîşkê Rûsyayê” û dahênana we ya mezîn di warê bijîşkiya mêjiyê zarokan de, ez germtirîn pîrozbahiyên xwe pêşkêşî we dikim.
Bidestxistina vê xelata giranbiha li ser asta welatekî wekî Rûsyayê, encama keda we ya bêrawestan, zanyariya we ya kûr û vîna we ya pîşeyî ye. Dahênana metodeke nû ji bo dermankirina nexweşiyên giran ên mêjiyê zarokan, ne tenê serkeftineke zanistî ya mezin e, lê belê xizmeteke pîroz e ji bo mirovahiyê û parastina jiyana nifşên siberojê.
Wekî bijîşkekî Kurd ê ji Rojavayê Kurdistanê, we di qada navneteweyî de şiyan û hişmendiya mirovê Kurd bi cîhanê da naskirin. Ev serkeftina we, ji bo gelê me û bi taybetî ji bo revenda Kurdistanî ya li diyasporayê, cihê şanazî û serbilindiyeke mezin e. Hûn mînakeke geş in ku nîşan didin mirovê Kurd di her şert û mercî de dikare bibe pêşengê zanist û afiranderê xêr û xizmetê.
Daxwazê ji we dikim ku bi heman rûhê dilsoziyê û bi zanyariya xwe ya bilind, di vê rêya pîroz de berdewam bin. Hêviya min ew e ku ev dahênana we bibe ronahiyek ji bo dermankirina wan zarokan û bibe hêzek ji bo ciwanên me yên li derveyî welat daku her dem ber bi lûtkeyên serkeftinê ve gavan biavêjin.
Ji bo we tenduristiyeke baş û di jiyana we ya pîşeyî û zanistî de serkeftinên hîn mezintir dixwazim. Her serbilind û serfiraz bin.
Şifa Barzanî
Serpereştiyarê Giştî yê Revenda Kurdistanî li Baregeha Barzanî
https://www.facebook.com/karzan.haedar.7
wats-telegram-http://009647504475408