Lêkolînerekî Enstîtuya Swêdî ya Lêkolînên Ewropayê dibêje, ji ber zexta zêde ya koçberan li ser Spanyayê, dibe ku were xwestin welatên din ên Ewropayê bi rengekî beşdarî çareserkirina krîzê bikin. Li hember vê yekê wezîrê koç û koçberan ê Swêdê dibêje, Swêd penaberan qebûl nake.
Lehiya bêwêne ya koçberan ber bi herêma Ceuta ya Spanyayê ve bûye yek ji mezintirîn ceribandinên peymana nû ya penaberiyê ya Yekîtiya Ewropayê. Bernd Barzsel lêkolînerê Enstîtuya Swêdî ya Lêkolînên Ewropayê dibêje: Ev krîz dikare şiyana welatên endamên Yekîtiya Ewropayê ya ji bo hevkarî û parvekirina berpirsiyariyê biceribîne.
Barzsel bal kişand li ser wê yekê, ku eger hejmara koçberan zexteke zêde li ser Spanyayê çêbike, wê demê dibe ku were xwestin welatên din ên Ewropayê bi rengekî beşdarî çareserkirina krîzê bibin.
Wî got: “Di rewşekê de, ku Swêd hejmareke pir kêm penaberan werdigire, zehmet e bêjin ku tu bandorek li ser wê rewşê nabe. Dibe ku daxwaz hebe ji bo ji nû ve dabeşkirina koçberan.”
Li hember vê yekê, Johan Forssell wezîrê koç û koçberan ê Swêdê ragihand, ku Stockholm naxwaze bibe beşek ji pêvajoya ji nû ve dabeşkirina koçberan.
Wî ji rojnameya “Express” a Swêdî re gotiye, eger mekanîzmaya piştevaniyê ya hatî di peymana nû ya penaberan a Yekîtiya Ewropayê de were çalakirin, Swêd amade ye alîkariya darayî bike, lê penaberan qebûl nake.
Di heman demê de, Jimmie Åkesson serokê Demokratên Swêdê (SD), daxwaz kiriye ku Spanya sînorên xwe bigire. Wî gef xwariye ku eger Madrîd wê gavê neavêje, divê gotûbêj li ser mayîna Spanyayê li herêma Schengenê were kirin û sînorên li gel wê ji nû ve werin kontrolkirin.