Hikûmeta Swêdê di çarçoveya hewldanên xwe yên dijwar de bo kêmkirina hejmara koçberan û ji nû ve rêkxistina demografiya welatê xwe, projeyeke nû xistiye holê û nêzîkî 37 hezar dolar dide her penaxwazekî derveyî Yekîtiya Ewropayê bi şertê ku bi dilê xwe vegere welatê xwe.
Li gor biryara hikûmeta Swêdê, her koçberekî derveyî Yekîtiya Ewropayê ku razî be welat biterikîne, bi qasî 350 hezar kronên swêdî jê re tê dayîn, ku dike nêzîkî 37 hezar dolarên Amerîkî, bo vê mebestê jî desthilata cîbicîkar budceyeke mezin bi nirxê 1.3 milyar kronî veqetandiye, digel vê jî, bertekên bo vê destpêşxeriyê sînordar bûn, li gor amarên fermî, ji serê îsal ve heta niha tenê 171 kesan amadebûna xwe nîşan daye ku wî pereyî werbigirin û vegerin welatên xwe.
Plana Swêdê tenê di dayîna pereyan de kurt nebûye, belê komek rêkarên yasayî û îdarî yên tund jî girtiye ber xwe. Stockholmê bi fermî mafê mayîna herdemî hilweşandiye û penaberan neçar dike her sê salan carekê muameleya mafê mayîna xwe nû bikin, hevdem di meha Tebaxê de yasayeke nû ket warê cîbicîkirinê ku tê de bo cara yekem 900 koçber berî ku mafê welatîbûnê werbigirin, neçar kirin beşdarî ezmûneke dijwar a girêdayî ziman, dîrok û kultura swêdî bibin.
Kabîneya niha ya Swêdê di sala 2022an de bi soza tundkirina siyasetên koçberiyê û rûbirûbûna tawanê, desthilatê girte dest, di vê çarçoveyê de û ligel germbûna pêşbaziya hilbijartinan, Partiya Demokratên Swêdê ku aliyekî rastgir ê tundrew e, kampanyayeke berfireh li ser otobusên veguhastina giştî destpêkiriye û koçberên Somalî dike armanc, di nivîsa bangawaziyan de bi nerasterast daxwaz ji xelkê Mogadîşûyê tê kirin ku bîra welatê xwe bînin û wê alîkariya darayî bi kar bînin bo vegerê bo welatê xwe.
Swêdê di sala 2015an de di lûtkeya qeyrana koçberan de pêşwaziyê li 163 hezar daxwazên penaberiyê kiribû, bi vî awayî li ser asta Ewropayê di pileya duyem a wan dewletan de bû ku li gor hejmara niştecîhên xwe herî zêde koçber li xwe girtibûn, lê piştî deh salan û di sala 2025an de, rêjeya hatina penaxwazan bo wî welatî bi rêjeya 96% daketiye.
Ev guhertin di welatekî de rû dide ku hejmara niştecîhên wî digihîje 10.6 milyon kesan û nêzîkî du milyon ji wan li derveyî welat ji dayik bûne, niha û tenê çend roj berî hilbijartina giştî ya 13ê Îlonê, dosyeya koçberiyê bûye karta sereke ya gengeşeyê, rapor jî pêşbaziyeke gelek tund û nêzîk di navbera bereya rastgir a desthilatdar û bereya çep a naverast bi serokayetiya Sosyal Demokratan de pêşbînî dikin, ku çarenivîsa paşeroja koçberan li wî welatî de diyar dike.