federasyon li seranserê Holandayê girîngiyê dide fêrkirina zimanê Kurdî

federasyona Revenda Kurdistanî li Holandayê projeyeke seranserî ji bo hêsankirin û fêrkirina zimanê Kurdî destpê kir, ku zarok û mezinên koçber li seranserê bajarên wî welatî digire nav xwe.

Federasyona Revenda Kurdistanî li Holandayê ragihand, armanca sereke ya vê destpêşxeriyê ew e ku zarokên Kurd ên li koçberiyê bikaribin bi awayekî bingehîn zimanê dayika xwe fêr bibin û şiyanên xwe yên zimannasî bihêz bikin, di heman demê de li gorî daxwaza malbatan, ders ji bo mezinan jî tên pêşkêşkirin.

Ji bo sala bê, federasyon bi hevahengî ligel rêxistinên endamên xwe kar li ser planeke berfirehtir dike, bi awayekî ku pengav bi pengav li hemû bajarên Holandayê navend û dibistanên fêrkirina zimanê Kurdî bên vekirin, da ku derfeta fêrbûnê ji bo herî zêde hejmara malbatên Kurd bi hêsanî bê mîsogerkirin.

Di çarçoveya pengavên pratîkî de jî, Dibistana Armanç li bajarê Rotterdamê bi hevkariya Koma Armanç hat vekirin, ku wekî navendekê dibe ji bo komkirina beşdaran bi armanca fêrbûna ziman û xurtkirina peywendiya wan bi çanda neteweyî ve. Dersên vê navendê her roja Yekşemê ji saet 18:00 heta 22:00ê di bin serpereştiya mamosteyekî zimanê Kurdî de tên birêvebirin û deriyê qeydkirinê ji bo beşdarên nû vekirî ye.

Parastina zimanê dayikê di nav civaka diyasporayê de, wekî yek ji mezintirîn astengiyên li pêşiya malbatên Kurd li Ewropayê tê hesibandin, bi taybetî ji bo nifşê nû ku di jîngeheke bihîstin û axaftinê ya cuda de mezin dibin. Federasyona Revenda Kurdistanî beşa perwerde û fêrkirinê wekî wareke stratejîk a xebata xwe diyar kiriye, ev kampanyaya nû jî wekî destpêka avakirina binesaziyeke berdewam tê hesibandin ji bo rêgirtina ji qutbûna nifşên pêşerojê ji nasname û çanda Kurdî.