Îro roja Duşemê, 6ê Berfanbar 2021an li Selahedînê Serok Mesûd Barzanî pêşwaziya koma bijartî ya Konfederasyona Revenda Kurd û federasyonên ku endam in kir.
Di civînê de Serok Barzanî destxweşî li birêveçûn û serkeftina Kongreya Konfederasyona Revenda Kurd û her wiha pîrozbahî li hilbijartina Desteya Konfederasyona Revenda Kurd kir û hêviya serkeftinê bo rêkxistin û hevkarîkirina zêdetir ji bo revenda Kurd xwest. Serok Barzanî di axaftina xwe de diyar kir ku pirsgirêka neteweya Kurd di ser berjewendiyên partî û kesayetiyan re ye û partî tenê amûreke ji bo xizmeta armanceke mezintir e.
Serok Barzanî di dirêjiya axaftinên xwe de tekez li ser peyama aştiyane ya gelê Kurd kir û daxwaz kir ku Konfederasyona Revenda Kurd bibe amûreke bi bandor bo nasandina jenosîd û neheqiya ku li ser gelê Kurd hatiye kirin. Serok Barzanî ronahî xiste ser dîroka tevgera rizgarîxwaza Kurdistanê û îradeya gelê Kurd bo mayin û bergirîkirina ji bo nasname û têkoşîna xwe ya li hember zulmê. Her wiha spasîya revenda Kurd kir ku di qonaxên cuda de her tim piştgiriya daxwazên rewa yên miletê xwe kirine.
