Kurdistaniyên diyasporayê.. Gelê têkoşerê Kurdistanê
Konfederasyona Revenda Kurdistanî her cure gotara kîn û nefretê, sivikayetî û handana bo tundûtîjiyê li dijî her pêkhate, ol û neteweyekê red dike.
Em di wê baweriyê de ne ku ev cure daxuyanî, bi her nav û hincetekê bin, ziyanê didin yekrêzî û kiyana civakî yê gelê Kurdistanê û bi tu awayî bi nirxên bilind ên mirovahiyê û prensîbên olî yên rastîn re li hev nakin.
Em ji vir dubare dikin ku Kurdên Êzdî beşekî resen, dêrin û veneqetayî ji laşê neteweya Kurd û dîroka Kurdistanê ne. Parastina maf û kerameta wan û hemû pêkhateyên din, erkeke mirovî û neteweyî ye. Konfederasyona Revenda Kurdistanî berdewam pêdagiriyê li ser parastina prensîba pêkvejiyana aştiyane dike û tekez dike ku divê rêz li firecûreya olî û çandî ya di navbera pêkhateyan de bê girtin.
Em daxwazê ji hemû aliyan, bi taybetî ji kesayetiyên olî û civakî dikin, ku bibin parêzerên çanda lêborînê û rê li her hewleke ku bixwaze duberekiyê û aloziyê di navbera pêkhateyan de çêbike bigirin. Aştî û tebayiya navbera mirovan sermayeya herî mezin a neteweya me ye û parastina vê pêkvejiyana dîrokî, erka ser milê her takekî Kurdistaniyê ye.
Konfederasyona Revenda Kurdistanî
12ê Tebaxa 2026an