Bi serpereştiya Konfederasyona Revenda Kurdistanî, Konferansa Giştî ya Federasyona Revenda Kurdistanî-Holenda bi beşdariyeke berfireh a revenda kurdî li bajarê Amsterdamê yê Holendayê birêve çû, ku tê de endamên desteya kargêriya nû hatin hilbijartin.
Roja şemiya 30ê Gulanê, bi amadebûna Îsmaîl Kamîl Serokê Konfederasyona Revenda Kurdistanî, Qehreman Osman Berpirsê Nivîsîngeha Şîfa Barzanî Serpereştiyarê Giştî yê Revenda Kurdistanî, Şukrî Bewarî Cîgirê Serokê Konfederasyonê û Şermîn Bozarslan Berpirsa Nivîsîngeha Rêxistinê, konferans hat lidarxistin ji bo ku ji nêz ve serpereştî û çavdêriya birêveçûna civînê bikin.
Bernameya yekem a konferansê ji gotûbêjeke vekirî û avaker di navbera nûnerên revenda kurdî li Holendayê û konfederasyonê de pêk hat. Di van gotûbêjan de, çendîn mijarên rojane yên girîng ji bo civaka kurdî, her wiha geşepêdana zêdetir a rêxistinê û hevkariyên nav revenda kurdî hatin nîqaşkirin.
Di beşa duyem de, spasî û pêzanîn pêşkêşî desteya kargêriya berê ya federasyona kurdî li Holendayê hat kirin ji bo hewldan, dilsozî û karên wan ên binirx di heyama borî de. Piştî vê rêzgirtinê, desteya berê bi fermî hat hilweşandin û pêvajoya hilbijartinê dest pê kir.
Ji bo hilbijartina desteya kargêriya nû, 15 berbijêran (kandîd) xwe amade kiribûn. Pêvajoya hilbijartinê di atmosfereke demokratîk, şefaf û pir bi rêz de birêve çû. Piştî cudakirina dengan, ew heft berbijêrên ku herî zêde deng bi dest xistibûn, wek desteya kargêriya nû ya Federasyona Revenda Kurdistanî-Holenda hatin hilbijartin. Desteya nû ji endamên her çar parçeyên Kurdistanê pêk tê, ev jî nîşaneya cihêrengî û yekrêziya gelê Kurd e.
Endamên hilbijartî yên desteya kargêriya nû:
Gohdar Botanî
Rîhan Seîd
Salar Hacî
Dîlan Salar
Ronak Fedhullahzade
Sebah Kerkûkî
Lava Kamîran
Konferansa giştî di atmosfereke erênî û tebayî de bi dawî bû. Amadebûyan baweriya xwe bi desteya nû anîn û hêvî kirin ku bi hev re kar bikin ji bo bihêzkirina civaka kurdî li Holendayê.
Bi vî rengî, dikare bê gotin ku rojeke serkeftî û pir bi wate bû ji bo federasyonê û revenda Kurdistanî.
Di dawiyê de, her kesî hêvî û daxwaz kirin ku desteya kargêriya nû di cîbicîkirina erk û berpirsiyariyên xwe de di qonaxa bê de serkeftî bin.
