Rêveberiya Rewşenbîrî û Hunerî li Zaxo bi hevbeşî ligel liqa Zaxo ya Sendîkaya Hunermendan, merasîmeke taybet ji bo nîşandana belgefîlma (Pêşwaziya Mirinê) ya derhêner Nesrîn Abidîn saz dike, ku balê dikşîne ser bûyer û karesatên serdema şerê li dijî terorîstên DAIŞê.
Li gor karnameyeke ragihandî, çalakî sibe Çarşemê, rêkefta 14.10.2026, di demjimêr 4ê êvarê de li hola Şaredariya Zaxo birêve diçe û deriyê amadebûnê ji bo hemû welatiyan, hunerhezan û rewşenbîran vekirî dibe.
Belgefîlma Pêşwaziya Mirinê karekî dokumênterî ye û balê dikşîne ser qonaxeke hestiyar û tijî qurbanîdana gelê Kurdistanê di rûbirûbûna çekdarên rêxistina terorîst a DAIŞê de, hevdem çend goşeyên nedîtî û êşên welatiyan û xebata hêzên berxwedanê di wê serdemê de bi şêweyekî hunerî belge dike.
Fîlmê Pêşwaziya Mirinê ji berhemanîna Kompaniya Amed Fîlmz û dokudramayek e, bi piştevaniya Hikûmeta Herêma Kurdistanê, Navenda Medyayî ya Pêşmergeyê Zêrevanî û Kurdistan TV hatiye encamdan. Di berhemanîna vî karê sînemayî de, Nizar Mîkaîl wek birêveberê wênegirtinê, Bîlal Şakir wek montêr, Irv Johnson di beşa muzîka resen de û Mihemed Abidîn wek alîkarê derhêner beşdar bûne. Herwiha endezyariya deng ji aliyê Hesen Mihemedî, rêkxistina rengan ji aliyê Meysem Kemalî, şêwirmendiya montajê ji aliyê Hoşyar Z. Nêrweyî û wergêrana fîlmê jî ji aliyê Lawîn Mihemed ve hatiye cîbicîkirin.
Piştî êrîşên sala 2014an ên terorîstên DAIŞê bo ser navçeyên Iraq û Herêma Kurdistanê, bi taybet karesata Şengalê û navçeyên derdorê, derhêner û hunermendên Kurd hewleke berdewam dane ji bo belgekirina tawanan û berxwedana qehremanane ya Pêşmerge û xelkê navçeyê. Ev cure berhemên sînemayî û dokumênterî ji bilî ku dibin arşîveke dîrokî ya zindî ji bo parastina rastiya bûyeran, roleke berçav jî di gihandina dengê qurbaniyan de bo raya giştî ya navxweyî û navneteweyî dilîzin. Zaxo wek yek ji navendên girîng ên Badînanê, bi berdewamî di rêya çalakiyên xwe yên çandî û hunerî ve girîngiyê dide qada sînemayê û belgekirina dîroka hevçerx.
Karzan Haidar
https://www.facebook.com/karzan.haedar.7/
