Federasyona Revenda Kurdistanê – Holenda û Koma 1 Welat, merasîmeke taybet ji bo bibîranîna cangoriyên jenosîda Êzdiyan li dar xistin, ku tê de koma şanoyê ya “Koma 1 Welat” karekî hunerî pêşkêş kir.
Îro duşemî rêkeftî 03/08/2026, Federasyona Revenda Kurdistanê – Holenda û Koma 1 Welat, li bajarê Eindhoven a Holendayê merasîmeke taybet ji bo bibîranîna jenosîda xwişk û birayên me yên Kurdên Êzdî yên Şingalê li dar xistin, ku tê de şanoyek bi awayekî hesthejêner çîroka karesat û êşên gelê Êzdî piştî êrîşa DAIŞê ya li ser Şingalê di 3yê Tebaxa 2014an de, ji bo amadebûyan veguhast.
Di wê merasîmê de, Federasyona Revenda Kurdistanê – Holenda, tekezî li ser girîngiya parastina bîranîna qurbaniyan, mafên mirovan, azadiya olî û mafên kêmîneyan kir.
Herwiha federasyonê hilbijartina huner û şanoyê ji bo veguhastina peyama bîranînê bi sedemeke girîng wesif kirin, ji ber ku huner dikare hest û ezmûna mirovî veguhêze, ku carinan peyv nikarin wê derbibirin.
Di dema pêşkêşkirina şanoyê de, bêdengî û balkişandina amadebûyan nîşana bandora wê peyamê bû, ku li ser êş û xweragirî û hêviya ji bo dadperweriyê bû.
Federasyona Revenda Kurdistanê – Holenda ragihand, ku bibîranîna jenosîdê ne tenê bîrkirina rabûriyê ye, belê gavek e ji bo fêrbûna ji dîrokê û hewildana ji bo ku tawana jenosîd û tundûtûjî careke din dubare nebe.
Cihê gotinê ye, welatiyên cuda yên ji aliyê neteweyî ve beşdarî merasîmê bûn û bi giştî piştgiriya xwe ji bo aştî û dijayetiya nefret û tundûtûjiyê nîşan dan.