Cara yekem di dîroka xwendina kurdî ya li derveyî welat de, projeya danîna standardeke zanistî û hevbeş ji bo zimanê kurdî hate ragihandin. Ev pêngav bi armanca yekxistina hemû zaravayan û dawîanîna li perçebûna perwerdeyî di navendên xwendinê yên revenda Kurdistanî de ye.
Di pêngaveke mezin a zanistî û akademîk de ji bo xizmeta zimanê dayikê, Şifa Barzanî Serpereştiyarê Giştî yê Revenda Kurdistanî eşkere kir ku kar ji bo danîna standardeke yekgirtî ji bo zimanê kurdî li diyasporayê tê kirin. Ev daxuyanî îro Şemî, 27ê Hezîrana 2026an li bajarê Düsseldorf a Almanyayê û di çarçoveya yekemîn Kongreya Federasyona Navneteweyî ya Zimanê Kurdî de hate diyarkirin, ku bi beşdariya bi dehan zanyar û pisporên warê zimannasiya kurdî ji seranserê cîhanê hate lidarxistin.
Serpereştiyarê Giştî yê Revenda Kurdistanî bal kişand li ser qonaxeke nû ya perwerdeyî û ragihand ku komkirina 35 dibistanên kurdî li seranserê cîhanê di bin sîwana vê federasyonê de, derfeteke zêrîn e daku em bi şêwazeke zanistî û serkeftîtir zimanê xwe bigihînin nifşên paşerojê. Ji bo vê armancê jî, wî tekez li ser giringiya hebûna standardeke hevbeş kir ku bibe pîverek bo hemû wan navendên ku xizmeta zimanê kurdî dikin.
Di berdewamiya axaftina xwe de, Şifa Barzanî bal kişand ser dewlemendiya zimanê kurdî û bal kişand li ser wê yekê ku niha bi rêya bernameyên online yên Hikûmeta Herêma Kurdistanê, xwendin bi pênc zaravayên sereke ku pêk tên ji: Soranî, Kurmancî, Badînî, Zazakî û Hewramî li ber dest e. Ev pêngava zanistî jî dihêle ku pêvajoya hînbûnê birêkûpêktir bibe û pirtûkên li diyasporayê bi awayekî sîstematîktir werin belavkirin.
Pirzaravayiya zimanê kurdî, her çend xaleke bihêz û dewlemendiyeke çandî ye, lê di aliyê perwerdeyî de li xerîbiyê her tim bûye astengiyeke mezin bo dariştina bernameyeke (curriculum) yekgirtî. Hewldana ji bo danîna standardeke zimanê kurdî li diyasporayê, wek yek ji projeyên akademîk ên herî dijwar û giring tê dîtin ku dikare bibe bingeh bo avakirina zimanekî yekgirtî yê nivîsandin û xwendinê ji bo nifşên paşerojê yên kurd li seranserê cîhanê.
Karzan Haedar
https://www.facebook.com/karzan.haedar.7
009647504475408