Festîvala Fîlm û Çanda Kurdî li Amerîkayê tê lidarxistin û organîzator dibêje ev sala pêncan e ku berdewam dikine û armanca wan, çanda Kurdî bi gelek awayan bi gelê Amerîkayê bidine nasîn.
Di festîvala sê rojî ya film û çanda Kurdî li New York a Amerîkayê de çendîn film hatine pêşandan û her wiha muzîkjenên Kurd jî beşdar bûn. Nivîskarên ku pirtûkên nû li ser Kurdan nivîsandine jî beşdar bûne û bi beşdarên festîvalê re gotbêj kirin.
Festîval ji bo danasîna çanda Kurdî ye. Fexrî Şakir ê ji Bakurê Kurdistanê ku yek ji organîzatorên festîvalê ye, got ev sala pêncan e ku wan li Amerîkayê ev festîvala li dar xistine, armanca wan, bila Kurd tenê bi şer û pevçûnan neyên naskirin, bi rêya festîvalên bi vî rengî ew ê çanda Kurdî bi cîhana derve bidin nasîn, di warê fîlm, muzîk û babetên din de.
Hêjayî gotinê ye ku du pirtûkên ku beşdarî mîhrîcanê bûne ‘Keçên Kobaniyê’ û ‘Keçên Dûkel Û Agir’ bûn, nivîskar jî beşdar bûn û ji beşdarvanan re axivîn. Kurdên li Amerîkayê, Amerîkaya Latîn û Hindî jî beşdar bûn.
