فیدراسیۆنی كۆمەڵە كوردستانییەكان لە سوید شێوازی كاردانەوەی هەندێك لە موسلمانانە توندروەكان لە سوید لە دژی هەنگاوی سوتاندنی قورئانی پیرۆز لەلایەن كەسێكی دانیماركییەوە ئیدەانە كرد.
فیدراسیۆنی ناوبراو لە بەیاننامەیەك دا دووپاتی كرد كە سووتاندنی قورئانی پیرۆز لە ژێر چەتری (ئازادی ڕادەربرین) مایەی شەرمەزارییە و جێگەی قبوولكردن نییە، و داوا لە دەسەڵاتدارانی سوید كرد ئیتر هەستیاریی ئایینی لەو جۆرە كارانەدا رەچاوبگرن و لە كاردانەوە خەراپەكان وریا بن بۆ ئەوەی نەبنە هۆكاری تێكدانی بارودۆخی گشتی.
بەیاننامەكە ئاماژەی بەوەش دا، ئەم جۆرە نارازییەو كاردانەوەی خەراپ و ناشارستانیانەی لەلایەن موسلمانانی توندڕەو كراون وەكوو پەلاماریی دژی كارمەندانی پۆلیس و سوتاندنی پاس و شوێنە گشتییەكان، تەنها خزمەتی لایەنە راستگرەكان و ئەو لایەنانە دەكات كە لە دژی بوونی بیانی و پەنابەران لە وڵاتی سوید كار دەكەن.
