عێراق سەرکۆنەی ئۆپەراسیۆنی داگیرکاری تورکیا لە ناوچە سنوورییەکانی هەرێمی کوردستان دەکات
ئەحمەد سەحاف وتەبێژی وەزارەتی دەرەوەی عێراق ڕایگەیاند، بە هەموو شێوەیەک هەر ئۆپەراسیۆنێکی سەربازی تورکیا لە ناوچە سنوورییەکانی باکووری وڵات رەتدەکەینەوە و،ئەمەش رێزنەگرتنی پەیماننامەی هاوسنووریەکان و پێشێلکردنی سەروەری خاکی عێراق و یاسا نێودەوڵەتییەکانە.
حکومەتی عێراق، دوپاتی دەکاتەوە، کە ڕێگا نادات خاکەکەی لەلایەن هیچ لایەک و بۆ زیان گەیاندن بە وڵاتانی دراوسێ و یەکلاکردنەوەی ناکۆییەکانیان بەکاربهێنرێت.
جێی ئاماژەیە، دوێنێ وەزیری بەرگری تورکیا رایگەیاند، سوپای وڵاتەکەی لە رێگەی وشکانی و ئاسمانییەوە ئۆپەراسیۆنێکی سەربازی بۆ سەر ئامانجەکانی چەکدارنی پەکەکە لە ناوچەکانی مەتینا، زاپ، ئاڤەشین و باسیان دەستپێکردووە.
سۆران حەسەن