سزای لە سێدارەدانی دوو بەندكراوی ڕۆژهەڵاتی كوردستان لە بەندیخانەی ئورمییە جێبەجێ كرا.
ڕێكخراوی مافی مرۆڤی هەنگاو لە ڕاگەیەنراوێكدا ئاماژەی بەوەداوە کە، بەرەبەیانی ئەمڕۆ شەممە 3-7-2021، سزای لە سێدارەدانی دوو بەندكراوی ڕۆژهەڵاتی كوردستان بە ناوەكانی (شەهریار ئەمیری) خەڵكی شنۆ و، (ناسر ئازموودە) خەڵكی ئورمییە لە بەندیخانەی ناوەندیی ئورمییە جێبەجێ كرا.
هەنگاو ئاشكراشیكردووە، ئەو دوو هاووڵاتییە بە تۆمەتی پەیوەندیدار بە ماددە هۆشبەرەكانەوە دەستگیركراون و، لەلایەن دەزگای دادوەری كۆماری ئیسلامی ئێرانەوە سزای لەسێدارەدانیان بەسەردا سەپاوە.
لای خۆشیانەوە بنەماڵەكەیان ئاشكرایانكردووە، كوڕەكانیان بەهیچ شێوەیەك كاری ماددەی هۆشبەریان نەكردووە، هاوکات باوكی شەهریاریش هەر لەو دۆسیەدا سزای لەسێدارەدانی بەسەردا سەپاوە و لە بەندیخانەی ناوەندیی ئورمییە ڕاگیراوە.