پەیمانگایەکی ئەمریکی پێشبینی کردووە هێرشی ملیشیاکان بۆ سەر بنکە سەربازییەکانی ئەمەریکا لە عێراق زیاد بکات و ئەمساڵ زۆرترین هێرش رووبدات.
پەیمانگای واشنتۆن بۆ توێژینەوەی رۆژهەڵاتی نێوەڕاست، راپۆرتێکی لەبارەی هێرشە مووشەکییەکانی عێراق بڵاوکردووەتەوە، کە بنکە سەربازییەکانی ئەمەریکا دەکەنە ئامانج، لە راپۆرتەکەدا هاتووە، تا كۆتایی ئەمساڵ پێشبینی دەکرێت 50 هێرشی دیکە بكرێتە سەر بنكەكانی ئەمەریكا لە عێراق، كە كوشتاریشی تێدا دەبێت، بەرانبەر بەمەش ئیدارەی بایدن شەش هێرشی تۆڵە ئامێز دژی میلیشیا عێراقییەكان ئەنجام دەدات.
پەیمانگاكە دەڵێت: ئەمەریکا هێزی سەربازی خۆی لە رۆژهەڵاتی نێوەڕاست كەمتر دەكاتەوە، بەڵام سەرباری ئەوەش ئەو هێرشانەی ئیدارەی بایدن بۆ تۆڵەكردنەوە دەیکەنەسەر نەیارەکانی زیاتر دەبن لەوانەی لە سەردەمی ترەمپ لە 2020 روویانداوە، بەڵام پێشبینی ناکرێت هێرشەکان یەکلاکەرەوە و کاریگەربن.
راپۆرتەكەی پەیمانگای واشنتۆن هانی بایدن و ئیدارەكەی دەدات، کە تۆڵەكردنەوەكانیان بەهێزتر بكەن و راستەوخۆ فەرماندەكانی میلیشیاكان بكەنە ئامانج، هەروەها پەیامی راستەوخۆ بۆ ئێران بنێرن کە درۆن بە گروپی چەكدار نەدەن و، ئەمە باشترە لەو تۆڵەكردنەوە دوور و تەمومژاوییانەی لە سووریا، یان لەسنوورەكانی عێراق و سووریا روو دەدەن.