ڕۆژی پێنجشەممە ڕێکەوتی ۲۸ـی تشرینی دووەمی ۲٠۲٤ شاندی ناوەندی ڕەوەندی کوردستانی کە پێکهاتبون ، لە بەرزان کۆچکایە، شارا محەمەد حاجی مەحمود و سەلام جزیری ،بە سەرپەرشتی سەلام کوردە، بەرپرسی ناوەندەکە، سەردانی پەڕلەمانی سویدیان کرد و لەگەڵ ئولە مۆلەر، سەرۆکی تۆڕی دۆستایەتی سویدی/کوردستانی کۆبونەوە.
لەکۆبونەوەکەدا، گفتوگۆ
کرا دەربارەی ئاریشە و ئاڵۆزییەکانی ڕۆژهەڵاتی ناوەڕاست و ئەو بارودۆخەی دوای شەڕی ئۆکرانیا و ڕوسیا لە ئەوروپا هاتوەتە کایەوە.
لەبەشێکی تری کۆبونەوەکەدا، بەڕێوەچون و سەرکەوتنی پرۆسەی هەڵبژاردنی خولی شەشەمی پەڕلەمانی کوردستان وەک هەنگاوێکی چارەنوسساز و پێویست هەڵسەنگێنرا بۆ درێژەدان بە ڕەوتی دیموکراسی لە هەرێمەکەدا، هەمووان هاوڕابوون، کە پێویستە هەنگاوی خێرا بنرێت بۆ پێکهێنانی حکومەتی نوێ لەپێناو بەدیهێنانی خواستەکانی خەڵک و پێشکەشکردنی خزمەتگوزارییەکانیان.
باسکردن لە کار و چالاکییەکانی ناوەندی ڕەوەندی کوردستانی بۆ فراوانکردنی بازنەی پشتیوانی لەدۆزی ڕەوای گەلی کوردستان و درێژەدان بەکاری پێکەوەیی و هەماهەنگی لەنێوان ناوەندی ڕەوەندی کوردستانی و تۆڕی دۆستایەتی سویدی/کوردستانی پەڕلەمانی سوید تەوەرێکی تری کۆبونەوەکە بوو.