نوێنەری کۆنفیدراسیۆنی ڕەوەندی کوردستانی، لە پەیوەندییەکی تەلەفۆنیدا لەگەڵ سەرۆکی کۆمیتەی پەرلەمانی دۆستایەتی کورد-کەنەدا دووپاتی پەیوەندیی کوردستان و کەنەدا و کردنەوەی کونسوڵخانەی ئەو وڵاتە لە هەولێر کرایەوە.
مستەر کورد، بەرپرسی ئۆفیسی پەیوەندییەکانی کۆنفیدراسیۆنی ڕەوەندی کوردستانی، لە پەیوەندییەکی تەلەفوونیدا لەگەڵ زیاد ئەبولتەیف، سەرۆکی کۆمیتەی پەرلەمانی دۆستایەتی کورد-کەنەدا ئاخافت و سڵاو و رێزی شفا بارزانی سەرپەرەشتیاری گشتیی رەوەندی کوردستانی پێگەیاند.
لەو پەیوەندییە تەلەفوونییەدا، دوو لایەن لەسەر دوایین بەرەو پێشچوونەکانى کوردستان و ناوچەکە ئاڵوگۆڕی بیروڕایان کرد.
لە بەشێکی دیکەی ئەو پەیوەندییە تەلەفوونییەدا، باس لە هەڵبژاردنی پەرلەمانی کەنەدا کرا، کە بڕیارە لە کۆتایی مانگی چواردا بێتە ئاراوە و لەو بازنەدا رەحیم رەشیدی، هیوای سەرکەوتنی بۆ زیاد خواست و سوپاسی کرد، کە لە ڕابردوودا بە هەموو شێوەیەک خۆی و هاودیدەکانی لە سەرخستن و چەسپاندنی یاسای بە تیرۆریست ناساندنی سوپای پاسداران لە كەنەدا تێکۆشاوە.
لە لایەکی دیکەوە نوێنەری کۆنفیدراسیۆن، بە بیری هێنایەوە، کە کەنەدا وەک ئەندامى هاوپەیمانى نێودەوڵەتى بۆ تێکشکاندنی داعش هاوکار و یارمەتیدەری پێشمەرگە بووە، هەروەها کەنەدا لە ساڵى ٢٠١٨ تاوەکوو ساڵى ٢٠٢٠ بەرپرسایەتی نێردەى ناتۆى لە عێراقی لە ئەستۆ بووە، کە هاوکارى عێراق و کوردستانی لە بووارى ڕاوێژکارى، چاکسازى و پەرەپێدانى کەرتى سەربازى کردووە، بە تایبەتى کۆلێژ و دامەزراوە سەربازییەکان تاکوو ببنە دامەزراوەیەکی مودێرن و پرۆفیشیناڵ.
زیاد وێڕای خۆشحاڵی خۆی لەو پەیوەندییە تەلەفوونییە، سڵاو و رێزی بۆ شفا بارزانی نارد و هاوکات بەڵێینی دا، لە ئەگەری سەرکەوتنی حیزبی کۆنەپاڕێزاندا هەموو هەوڵی خۆی بۆ گەشە و پتەوترکردنی پەیەندییەکانی نێوان کەنەدا و کوردستان دەدا و لەو بازنەدا قسە لەسەر پێویستی كردنەوەی کونسوڵخانەی کەنەدا لە هەولێر کرایەوە.
