سەرۆکی ھەرێمی کوردستان بەشداری مەراسیمی سوێند خواردنی سەرۆککۆماری ئێران دەکات و، دواتریش لەگەڵ سەرۆککۆماری ئێران و بەرپرسانی باڵای ئەو وڵاتە کۆبوونەوە ئەنجام دەدات.
عەبدوڵڵا ئاکرەیی، بەرپرسی پەیوەندییەکانی نێوان هەرێم و ئێران، بە ماڵپەڕی فەرمیی پارتی راگەیاندووە، کە ئەمڕۆ کاژمێر ٥ی ئێوارە مەراسیمی سوێند خواردنی سەرۆککۆماری ئێران بەڕێوەدەچێت و، لە لایەن سەرۆککۆمار و سەرۆکی پەرلەمانی ئەو وڵاتە، بە فەرمیی بانگھێشتی سەرۆکی ھەرێمی کوردستان کراوە تا بەشداری لەو مەراسیمە بکات، سەرۆکی ھەرێمی کوردستان و سەرۆکی پەرلەمانی کوردستان و چوار وەزیر بەشدار دەبن.
بەرپرسی پەیوەندییەکانی نێوان ھەرێم و ئێران ئەوەیشی ئاشکرا کردووە، کە بڕیارە سبەی سەرۆکی ھەرێمی کوردستان لەگەڵ سەرۆککۆماری نوێی ئێران کۆبێتەوه و، دواتر لەگەڵ گەورە بەرپرسانی ئەو وڵاتەش دیداری ببێت و، لەوکۆبوونەوە و دیدارانەشدا، باس لە پەیوەندی مێژوویی نێوان ھەردوولا دەکرێت و، چەندین پرسی دیکەش گفتوگۆی لەبارهوه دەکرێت، لەوانە باردۆخی ناوچەکە و سیاسیی و بازرگانی.
ئاکرەیی باسی لەوەشکردووە، کە سەرۆکی ھەرێمی کوردستان وەکو سەرۆککۆمارێک پێشوازی لێ دەکرێت و دوو رۆژ لە ئێران دەمینێتەوە و، دواتر دەگەڕێتەوە ھەرێمی کوردستان.