نوێنەری کۆنفیدراسیۆنی ڕەوەندی کوردستانی، لە فەرەنسا دیداری لەگەڵ دۆستێکی دێرینی کورد سازدا، و چەند پرسێکیان تاوتوێ کرد.
مستەر کورد، بەرپرسی ئۆفیسی پەیوەندییەکانی کۆنفیدراسیۆنی ڕەوەندی کوردستانی، لە پاریسی پایتەختی فەرەنسا، چاوی بە دۆستی دیار و دێرینی كوردستان د. فرێدێریک تیسۆ، كونسوڵی پێشووی فەرەنسا لە كوردستان كەوت.
لەو دیدارەدا، باسێكی هەمەلایەنە لەسەر ئاڵوگۆڕەكانی ڕۆژهەڵاتی ناوەڕست، پێگە و داهاتووی كوردستان هاتە ئاراوە. هاوكات بە وردی رۆڵ و دەوری ڕەوەندی كوردستانی تاوتوێ كرا.
د. تیسۆ، وێڕای دەربڕینی خۆشحاڵی خۆی لە كار و پرۆژەكانی كۆنفیدراسیۆن، هاوكات پشتیوانی قووڵی خۆی بۆ یەكڕیزی كوردستانییان دەربڕی و داوا و تكای ئەوە بوو، کە كوردستانییان لەم دۆخە ناسك و پڕ لە ئاڵوگۆڕەی ڕۆژهەڵاتی ناوەردڕاستدا پێویستە تەباییی خۆیان بپارێزن تاكوو بتوانن لە ڕەوتی ئاڵوگۆڕە خێراكاندا ماف و دەستەوتەكانی خۆیان مسۆگەر بكەن.
د. تیسۆ، بە هەستێكی تەژی لە وەفاداری باسی لەوە كرد، كە ئەم شوێنەی لێیدانیشتوین و لێی دەژیم، چەند خولەك لە گۆڕستانی پیرلاشێز دوورە، كە گۆڕی ڕێبەری مەزن. د. قاسملوو لەوێیە و ئەو تۆوی خۆشەویستی كوردستان و خەڵكەكەی لە ناخی ئێمەدا چاند.
ناوبراو خۆشحاڵی خۆشی بۆ یەكڕیزی حیزبی دیموكراتی كوردستانی ئێران دەربڕی و وتی، ئاواتم بوو ئەو تەباییە ببینم…
لە لایەكی دیكەوە د. تیسۆ، هیواخواز بوو سەرۆك بارزانی وەكوو رێبەرێكی نەتەوەیی بۆ یەكڕیزی كوردستانی تێبۆشێ و لەم قوناغەدا ڕۆڵی كارای خۆی بۆ پێشخستن و سەرخستنی دۆزی كورد لە ناوچەكەدا بگێڕێ.
رەحیم رەشیدی، سوپاسی دڵسۆزی و پشتیوانی بەردەوام و شوێندانەری د. تیسۆی كرد، هاوكات لەسەر چەند چالاكی بۆ پتەوتركردنی دۆستایەتیی كوردستان-فەرەنسا ئاڵوگۆڕی بیروڕایان كرد.
لە پاڵ ئەمانەدا د. تیسۆ، دوایین پەرتووكی خۆی بە ناوی ”مرۆڤێك بە پێوە”، كە بەسەرهات و سەربردەی خۆیەتی بۆ خزمەت بە مڕۆڤایەتی بە گشتی و خەڵكی كوردستان بە تایبەتی وەكوو دیاری دایە مستەر كورد.
جێی باسە، پەڕتووكەكە پێشكەش كراوە بە شەهیدانی نەمر د. قاسموو د. شەرەفكەندی.