بەرپرسی ئۆفیسی ڕاگەیاندنی کۆنفیدراسیۆنی ڕەوەندی کورستانی، سەردانی ناوەندی برۆکسلی کرد و لە لایەن بەرپرسی ناوەندەکە پێشوازی لێکرا و دواتر لەسەر کار و چالاکییەکانی ناوەندە گۆفتوگۆ کرا.
ڕۆژی پێنجشەممە، ٢٧ی١١ی٢٠٢٥، هەرمن ئەحمەد ئەندامی کۆمیتەی بەڕێوەبەری و بەرپرسی ئۆفیسی ڕاگەیاندن، بە یاوەری حەمید سینو، سەردانی بنکەی سەرەکیی ناوەندی ڕەوەندی کوردستانییان لە شاری برۆکسلی پایتەختی بەلجیکا کرد و لە لایەن مستەفا شاکر بەرپرسی ناوەندەکەوە پێشوازییان لێکرا.
لە دیدارێکدا، گفتوگۆیەکی چڕوپڕ لەبارەی پرسە گرنگەکانی پەیوەست بە کاری هاوبەش و پەرەپێدانی پەیوەندییەکانی نێوان کۆمیتەی بەڕێوەبەریی کۆنفیدراسیۆن و ناوەندی برۆکسل کرا. هەروەها جەخت لەسەر هەماهەنگی لەگەڵ کۆمەڵەی ئاشتیی ناوەندی بەلجیکا و کۆمەڵەی هێڤی و سەرجەم ئەو ڕێکخراو و کەسایەتییانەی باوەڕیان بە کارنامەی کۆنفیدراسیۆن هەیە کرایەوە.
لە بەشێکی دیکەی کۆبوونەوەکەدا، ئاماژە بەوە کرا، کە پێویستە کۆنفیدراسیۆن ڕۆڵێکی کاریگەر و بنەڕەتی لە سەرخستنی کارەکانی ناوەندی برۆکسلدا بگێڕێت، هاوکات هەردوولا هاوڕابوون لەسەر پێویستیی کارکردنی پێکەوەیی بۆ پڕکردنەوەی ئەو بۆشاییانەی، کە لەنێوان ڕەوەندی کوردستانی و ڕێکخراوەکاندا هەن.
دواجار بڕیار درا، کە کۆنفیدراسیۆن وەک پردێک بۆ کاری هاوبەش و هەماهەنگیی نێوان ڕێکخراوە ئەندامەکان کار بکات و پشتیوانیی ڕێکخستنی ناوماڵی ناوەند و کۆمەڵەکانی وڵاتی بەلجیکا بێت بە مەبەستی بەهێزکردنی ڕۆڵی ناوەندە کوردییەکان لە شوێنە ستراتیژییەکانی وڵاتی خانەخوێدا.
لە کۆتاییی دیدارەکەدا، هەردوولا سەرنجیان خستەسەر کۆمەڵێک بابەتی گرنگی ستراتیژی و جەختیان لەسەر بەردەوامی و پەرەپێدانی پەیوەندییەکان کردەوە. ئەوەش بە ئامانجی بەهێزکردنی ڕۆڵ و پێگەی کۆنفیدراسیۆن لەسەر ئاستی ئەوروپا، بەتایبەتی لە برۆکسل، کە وەک پایتەختی سیاسیی بەلجیکا و یەکێتیی ئەوروپا دادەنرێت.