بە مەبەستی پاراستن و بەزیندووهێشتنەوەی جلوبەرگی رەسەنی کوردی، ئیدارەی سەربەخۆی زاخۆ میوانداریی فیستیڤاڵی شەل و شەپکی کرد، لەم بۆنە گەورەیەدا کە بە بەشداریی ژمارەیەکی یەکجار زۆر لە هاووڵاتییان و هونەرمەندانی هەر چوار پارچەی کوردستان بەڕێوەچوو، چەندین چالاکیی جۆراوجۆری کولتووری نمایش کران و رووداوەکە وەک گرنگترین بۆنەی کولتووریی شارەکە هەژمار دەکرێت.
ئامانجی سەرەکیی لە رێکخستنی ئەم رووداوە هونەرییە، ناساندن و پاراستنی جلوبەرگی نەتەوەیی کوردییە لە کاڵبوونەوە و گواستنەوەیەتی بۆ نەوەکانی داهاتوو، لە میانی چالاکییەکاندا، سەرجەم بەشداربووان بە پۆشینی شەل و شەپکی کوردییەوە دەرکەوتن و چەندین تابلۆی کولتووریی جیاوازیان پێشکەش کرد.
جگە لە نمایشکردنی جلوبەرگ، بەشێکی دیکەی فیستیڤاڵەکە تەرخان کرابوو بۆ هونەرە رەسەنەکان، پێشکەشکردنی گۆرانیی کوردی و نمایشەکانی هەڵپەڕکێی فۆلکلۆری، رەنگ و رووناکییەکی یەکجار تایبەت و جیاوازیان بە کەشوهەوای رووداوەکە بەخشی.
بەهۆی قەبارەی بەشداریپێکردن و گرنگیی پەیامەکەیەوە، ئەم فیستیڤاڵە بە یەکێک لە دیارترین و گرنگترین بۆنە کولتوورییەکانی شاری زاخۆ دادەنرێت کە تێیدا خەڵکێکی زۆر لە ناوچە جیاوازەکانەوە تێیدا کۆبوونەوە.
شەل و شەپک یەکێکە لە کۆنترین و رەسەنترین جۆرەکانی جلوبەرگی نەتەوەیی پیاوانی کورد، کە زیاتر لە ناوچەکانی بادینان، باکوور و رۆژئاوای کوردستان باوە، لەگەڵ پێشکەوتنی سەردەم و گۆڕانی شێوازی پۆشاک، رێکخستنی ئەم جۆرە فیستیڤاڵانە هەنگاوێکی ستراتیژییە بۆ رێگریکردن لە لەناوچوونی شوناسی نەتەوەیی، ئیدارەی سەربەخۆی زاخۆش بەهۆی پێگە جوگرافی و مێژووییەکەیەوە، بەردەوام رۆڵی گەورەی هەبووە لە پاراستنی کەلەپوور و فۆلکلۆری کوردیدا، هەروەها کۆکردنەوەی خەڵکی هەر چوار پارچەی کوردستان لەم جۆرە بۆنانەدا، جەخت لەسەر یەکڕیزیی و بەهێزیی پەیوەندییە کولتوورییەکانی نەتەوەی کورد دەکاتەوە.