لە کاتێکدا ئەمریکا بە ئاهەنگ و یارییە ئاگرینەکان یادی 250 ساڵەی سەربەخۆیی خۆی دەکاتەوە، پاپا لیۆی چواردەهەم کە یەکەم پاپای لەدایکبووی ئەمریکایە، ڕۆژی 4ی تەمموزی لە دوورگەی لامپیدۆزای ئیتاڵیا بەسەربرد، مەبەست لەم سەردانە ڕێزلێنان بوو لەو دەیان هەزار کۆچبەرەی لە پێناو گەیشتن بە ئازادی و ژیانێکی باشتر لە ئەوروپا گیانیان لەدەستداوە.
ئەم سەردانەی پاپا پەیامێکی هێمادار و زۆر بەهێزە دژی سیاسەتە توندەکانی ئیدارەی دۆناڵد ترەمپ بەرانبەر بە کۆچبەران، پاپا وەبیری ئەمریکییەکانی هێنایەوە کە وڵاتەکەیان لە بنەڕەتدا لەسەر دەستی کۆچبەران بنیاد نراوە و پاراستنی ژیانی مرۆڤەکان پێشوازیکردن لە کۆچبەرانیش دەگرێتەوە، هاوکات بانگەوازی ئاراستەی سەرکردەکانی ئەوروپا کرد تا بەرپرسیارێتی مێژوویی خۆیان لە قەیرانی کۆچبەران هەڵبگرن و بە بەزەییەوە مامەڵە لەگەڵ ئەو کەسانە بکەن کە لە دەست ململانێ و هەژاری هەڵدێن و نابێت تەنیا وەلا بنرێن یان ڕەتبکرێنەوە.
دوورگەی لامپیدۆزا کە نزیکترین خاڵی ئەوروپایە لە کیشوەری ئەفریقاوە، ساڵانێکە بووەتە ناوەندی سەرەکی گەیشتنی کۆچبەران. هەرچەندە ئامارەکان دەریدەخەن کە ژمارەی گەیشتنی کۆچبەران بۆ ئیتاڵیا لەمساڵدا بۆ 14464 کەس دابەزیوە، بەڵام مەترسییەکانی سەر گیانیان کەم نەبووەتەوە، بە جۆرێک لە ساڵی 2014وە زیاتر لە 35000 کۆچبەر لە دەریای ناوەڕاستدا بێسەروشوێن بوون و خنکاون، ئەم هەنگاوەی پاپا بەردەوامییدانە بەو ڕێبازەی کە پێشتر پاپا فرانسیس لە ساڵی 2013دا لە هەمان دوورگەوە بۆ پشتگیری کۆچبەران دەستی پێکردبوو.
کارزان حەیدەر
https://www.facebook.com/karzan.haedar.7