شاری ئالماتی باوەشی بۆ کۆنفرانسی نێودەوڵەتیی توێژینەوەی کوردی کردەوە، تیایدا کۆمەڵێک لە زانایان، ئەکادیمیستان و نووسەرانی لێهاتووی جیهان کۆبوونەتەوە بۆ ئەوەی لە ڕێگەی دیالۆگێکی قووڵی ئەکادیمییەوە، داهاتووی زمان، مێژوو و کولتووری کوردی بەرەو ئاسۆیەکی گەشتبینتر بەرن.
ئەمڕۆ چوارشەممە 15ـی تەممووزی 2026، لە شاری ئالماتی لە وڵاتی کازاخستان، بە بەشداریی بەرفراوانی زانایان، ئەکادیمیستان، نووسەران و نوێنەرانی دامەزراوە کوردییەکان لە وڵاتە جیاوازەکانەوە، کۆنفرانسی نێودەوڵەتیی توێژینەوەی کوردی دەستی بە کارەکانی کرد.
ئەم کۆنفرانسە وەک پلاتفۆرمێکی گرنگی زانستی سەیر دەکرێت بۆ بەهێزکردنی هاوکارییە ئەکادیمییەکان، پاراستنی میراتی دەوڵەمەندی کوردی و گەشەپێدانی توێژینەوە نێودەوڵەتییەکان لەسەر زمان و مێژووی کورد.
لە میانەی بەڕێوەچوونی پانێڵەکانی کۆنفرانسەکەدا، مژارە سەرەکییەکانی پێوەست بە زمان، مێژوو، کولتوور، ئەدەبیات و ئاسۆکانی داهاتووی توێژینەوە کوردییەکان خرانە ڕوو و لە لایەن پسپۆڕانەوە گەنگەشەی وردیان لەسەر کرا.
هەروەها ئامادەبووانی کۆنفرانسەکە بە گەرمی پێشوازییان لە بەشداریی ئیسماعیل کامیل، سەرۆکی کۆنفیدراسیۆنی ڕەوەندی کوردستانی کرد و پێزانین و ڕێزی زۆریان بۆ ئامادەبوونیان لە شاری ئالماتی دەربڕی.
بەشداربووان هیوایان خواست کە ئەم جۆرە کۆبوونەوە زانستییانە ببنە هەنگاوێکی کاریگەر و بنەڕەتی بۆ تۆکمەکردنی یەکڕیزیی کولتووری و ئەکادیمیی گەلی کورد.
کۆنفیدراسیۆنی ڕەوەندی کوردستانی هەمیشە هەوڵی داوە پردی پەیوەندی لە نێوان کوردانی تاراوگە و ناوەندە زانستی و کولتوورییەکاندا دروست بکات، شاری ئالماتی لە کازاخستانیش مێژوویەکی دێرین و گرنگی لە ئامێزگرتنی کۆمەڵگەی کوردیدا هەیە، سازکردنی ئەم کۆنفرانسە نێودەوڵەتییە لەم ناوچەیەدا لە ساڵی 2026دا، گرنگییەکی تایبەتی هەیە بۆ پاراستنی شوناسی نەتەوەیی و بەستنەوەی توێژەرانی جیهانی بە مێژوو و زمان و کولتووری کوردییەوە.
کارزان حەیدەر
https://www.facebook.com/karzan.haedar.7
