بە بۆنەی دەستپێکردنی ساڵی خوێندنی ٢٠٢٦–٢٠٢٧،قوتابخانەی کوردی لە لوکسمبۆرگ بۆ منداڵانی کورد دەکرێتەوە، هاوکات داواش دەکەن لە رۆژی کردنەوەیدا سەرجەم باوکان و دایکانی منداڵەکان بەشداربن لە پێشوازیی قوتابییەکان.
یەکەم رۆژی کردنەوەی قوتابخانەکە لە ڕۆژی شەممە، ٢٦ی ئەیلووای ٢٠٢٦، دەبێت ئامانج لێی ئەوەیە، کە خێزانە کوردەکان بەشداری لە یەکەم ڕۆژی ساڵی خوێندن بکەن و خۆشیی ئەو ڕۆژە تایبەتە لەگەڵ قوتابخانە و قوتابییەکان هاوبەش بکەن.
قوتابخانەی کوردی لە لوکسمبۆرگ، جەخت لەوە دەکاتەوە کە ئامادەبوون و بەشداریی خێزانەکان دەبێتە هۆی زیاترکردنی هێز و پشتیوانی بۆ بەردەوامبوونی کار و خزمەتکردن بە زمانی کوردی و منداڵە کوردەکان لە لوکسمبۆرگ.
لە هەمان کاتدا، قوتابخانەکە ئاماژەی بە گرنگیی بەهێزکردنی پەیوەندیی منداڵە کوردەکان بە زمان، کەلتوور و ناسنامەی کوردی کردووە و بەشداریی خێزانەکان بە بەشێک لە پشتگیریی ئەم ئامانجە دەزانێت.
جێی باسە، کۆنفیدراسیۆنی رەوەندی کوردستانی،لەمیانەی هەوڵەکانی بۆ پاراستن و گەشەپێدانی زمانی دایک لە دیاسپۆرا، بە هەماهەنگی لەگەڵ وەزارەتی پەروەردەی حکوومەتی هەرێمی کوردستان، پرۆسەی فێرکردنی زمانی کورد لە رێگەی ناوەندی فەرمیی، هەروەها لە ڕێی ئۆنلاینیشەوە لە سەرانسەری جیهان بەڕێوە دەبرێن.