شفا بارزانی پیرۆزبایی ساڵیادی دامەزراندن لە وڵات تیڤی دەکات

بە بۆنەی ساڵیادی دامەزراندنی کەناڵی ئاسمانیی وڵات تیڤی، شفا بارزانی، سەرپەرشتیاری گشتیی ڕەوەندی کوردستانی لە بارەگای بارزانی، پەیامێکی پیرۆزبایی ئاراستەی بەڕێوەبەرایەتی، کارمەندان، پەیامنێران و هاوکارانی ئەو دەزگا میدیاییە نیشتمانییە کرد.

لە پەیامەکەدا شفا بارزانی ئاماژە بەوە دەکات، وڵات تیڤی لە ماوەی کار و پەخشیدا بووەتە دەنگێکی ڕاستگۆ، بەتایبەت بۆ ڕۆژئاوای کوردستان و بەگشتی بۆ سەرجەم بەشەکانی کوردستان، هەروەها لە سایەی پابەندبوونی بە پرەنسیپە پیشەیی، نیشتمانی و کوردایەتییەکان، توانیویەتی متمانەی بینەرانی لە ناوخۆ و لەناو ڕەوەندی کوردستانی لە دەرەوەی وڵات بەدەستبهێنێت و ببێتە پردێکی پەیوەندی لە نێوان نیشتمان و دیاسپۆرادا.

سەرپەرشتیاری گشتیی ڕەوەندی کوردستانی ڕۆڵی بەرچاوی ئەو کەناڵەی لە پاراستنی زمان، کلتوور و دۆزی ڕەوای گەلی کوردستان بەرز نرخاندووە و هیوای خواستووە هەمیشە لە ئەرکە پیرۆزەکەیاندا سەرکەوتوو و بەردەوام بن بەرەو ساڵانێکی پڕ لە دەستکەوت.

کەناڵی ئاسمانیی وڵات تیڤی وەک یەکێک لە میدیا دیارەکانی ڕۆژئاوای کوردستان، لە ساڵانی ڕابردوودا بایەخێکی زۆری بە ڕووماڵکردنی پرسە نەتەوەییەکان و بارودۆخی ناوچەکە و دەنگی دیاسپۆرا داوە، نووسینگەی دیاسپۆرای بارەگای بارزانیش لە چوارچێوەی هەوڵە بەردەوامەکانیدا بۆ پاڵپشتی لە میدیای کوردی، جەخت لە پێگەی کاریگەری ئەو دەزگایانە دەکاتەوە کە خزمەت بە گوتاری نەتەوەیی، ناسنامەی نیشتمانی و بەستنەوەی ڕەوەندی کوردی بە وڵاتەوە دەکەن.

دەقی پەیامەکە:

بە بۆنەی ساڵیادی دامەزراندنی وڵات تیڤی، بە گەرمی پیرۆزبایی لە بەڕێوەبەرایەتی، کارمەندان، پەیامنێران و سەرجەم هاوکارانی ئەم دامەزراوە میدیاییە نیشتمانییە دەکەم.

وڵات تیڤی لە ماوەی پەخش و کارکردنیدا بووەتە دەنگێکی ڕاستگۆ، بەتایبەتی بۆ ڕۆژئاوای کوردستان و بەگشتی بۆ تەواوی کوردستان، بە پێداگریتان لەسەر پرەنسیپە پیشەیی، نیشتمانی و کوردایەتییەکان، توانیوتانە متمانەی بینەرانی خۆتان لە ناوخۆ و لەناو ڕەوەندی کوردستانی لە دەرەوەی وڵات بەدەستبهێنن و ببنە پردێک لە نێوان نیشتمان و ڕەوەندەکەماندا.

ئێمە ڕۆڵی گرنگتان لە پاراستنی زمان، کلتوور و دۆزی ڕەوای گەلەکەماندا بەرز دەنرخێنین و هیوادارین هەمیشە لە کارە پیرۆزەکەتاندا سەرکەوتوو و بەردەوام بن.

بە هیوای ساڵانێکی زۆری پڕ لە دەستکەوت و سەرکەوتن.

شفا بارزانی
سەرپەرشتیاری گشتیی ڕەوەندی کوردستانی
بارەگای بارزانی
10.10.2026