نیشتمانێك نغرۆ لە غەدر
لەتف عومەر
بەجەنگەڵێکا هەنگاو ئەبەم
تەنهاخۆم و تارمییەکەم
پێکانم دەگەنە دارستانێ
ڕووت و قووت
گەڵایەك لەزەوی نابینی
بۆتە گەڵا جاڕی قوربانی
لەپشت یاڵێکی داخکراو
هەموو ئازای قاش ، قاشکراو
خۆم دا بەدەم
جەند پەڵە وەنەوشەیەکا
لە دەمی داس جێ مابوون
شەکەت و ماندو
نەیان ئەتوانی
بچنە ژێر چەنەی ژنە
ئاغرێکی بەساڵاچوو
لە دوورەوە
چەند مەڵۆیەك لەپووشی
گوڵەگەنمم دی
بەبەرخۆرەوە ڕەش داگەڕابوون
کەمێکی مابوو بگەمەلایان
مەڵۆیەک بەکوڵ ئەگریا
چڵێکم لێ هەڵگرت
وتم باوانەکەم چییە وابەکوڵ
هەناسەت پڕکردووە لەگریان و
چاوەکانت بوونەتە گۆمی فرێسک
پێی وتم هەڵم مەگرە
با لەجێی خۆم وەك نیشتیمان بسووتێم
بۆ شیعری شاعیرێك ئەگریم
دوێنێ خۆی بوو
دڵی خەرمانی دەرهێنام .