Seroka Komeleya Çandî ya Kurdî ya endamê Konfederasyona Revenda Kurdistanê, beşdarî civînekê bû ku ji bo Wezîra Kar û Karûbarên Civakî ya Almanyayê hatibû sazkirin.
Di 31.08.2026an de, Cîhan Muslim Seroka Komeleya Çandî ya Kurdî li Leipzigê, beşdarî civîna “Mitreden. Mit Bas” bû ku li bajarê Dresdenê hate lidarxistin, tê de Bärbel Bas Wezîra Federal a Kar û Karûbarên Civakî ya Almanyayê amade bû ji bo guhdarîkirina nêrîn û axaftinên rêxistin û komeleyan.
Di wê civînê de li ser çend mijarên girîng ên civakî û aborî gotûbêj hat kirin, di nav de: bazara kar, kêmbûna pisporan, koç û penaberî, beşdariya civakî û paşeroja jiyana hevbeş li Almanyayê.
Cîhan Muslim di wê çalakiyê de bi nûnertiya Komeleya Çandî ya Kurdî ya Leipzigê beşdarî diyalog û danûstandina bîr û boçûnan bû û tekez kir ku beşdarbûna di civînên bi vî rengî de gaveke girîng e ji bo bihêzkirina diyalog, hevkarî û gihandina dengê Kurdan li Almanyayê.
Wekî ku Cîhanê diyar kir, ji bo civakên Kurdî û rêxistinên civakî, beşdarbûna di çalakiyên bi vî rengî de girîng e, bi taybetî ji bo Kurdên diyasporayê, ji ber ku derfetek e ji bo gihandina deng û pirsgirêkên koçberan û neteweyên cuda bi saziyên siyasî yên Almanyayê.