کۆنفیدراسیۆنی ڕەوەندی کوردستانی، بە بۆنەی لە دایکبوونی مستەفا بارزانیی رابەری نەتەوەییی کورد، پەیامێکیان بڵاو کردۆتەوە، کە تێیدا هاتووە، پتر له نیو سەدە سەرکەوتووانه و له خۆبوردووانه رابەرایەتیی بزاڤی رزگاریخوازی گەلی کوردستانی کرد، هاوکات جەختیش لەوە دەکەنەوە، ئەرکی سەرشانی هەموو پارت و کۆمەڵ و رێکخراو و چین و توێژ و کەسێکه، که لەسەر ئەم خاکه پیرۆزە دەژین، یادی بکەنەوه و ئاهەنگی له دایک بوونی بگێڕن و پەیمان تازه بکەنەوه، که هەرگیز و هەرگیز رێبازی پارتی و بارزانیی نەمر بەرنەدەن.
دەقی پەیامەکە:
له بیرەوەری له دایک بوونی بارزانیی نەمردا
سڵاو له یادێکی مەزن
خەباتی سەرداری گەوره و خۆشەویستی گەلی کورد خوالێخۆشبوو جەنراڵ بارزانی نەمر، شکۆی مەزترین زنجیرەی مێژووی نەتەوەیی کورده لەم چەرخەدا، که پتر له نیو سەدە سەرکەوتووانه و له خۆبوردووانه ڕابەرایەتیی بزاڤی رزگاریخوازی گەلی کوردستانی کرد و نموونەی هەره بەرزی رەشیدی و رەوشتپاکی و دڵسۆزی و مرۆڤدۆستی کوردایەتی بووه.
بارزانیی نەمر و رێبازیی بارزانی، گەوهەرێكی دەگمەن و بەرپرسیاریەتییەكی مەزن بوو له ماوه‌ی خه‌باتیدا و چه‌ندان ده‌ستكه‌وتی بۆ گه‌له‌كه‌ی به‌ده‌ست هێنا، بارزانی نه‌مر، هه‌موو ژیانی بۆ به‌دیهێنانی مافه‌كانی گه‌لی كوردستان ته‌رخان كرد، سه‌رده‌مێك وه‌ك پێشمه‌رگه‌یه‌كی گیان له‌سه‌رده‌ست به‌رگری له كۆماره تاقانه‌كه‌ی كوردستانی ڕۆژهه‌ڵاتی كوردستان ده‌كرد و سه‌رده‌مێكیش له باشووری نیشتمان ڕووبه‌ڕووی دڕنده‌ترین داگیركاریی بووەوە.
بارزانیی نەمر، نموونەی هەره بەرزی قوربانییدان و لەخۆبووردن بوو، تەنانەت دەستکەوتەکانی ئەمڕۆش بەرهەمی خەباتی بێوچان و خوێن بەهای ئەم سەرداره مەزنه و شەهیدانی کورد و کوردستانه….
لەو گەشته پڕ هەوراز و نشێوانه، پڕ ئازار و ئەشکەنجەیەدا، گەلێک وانەی پر له سەرفرازی و سەروەری بۆ بەجێ هێشتووین، که هەتا دوونیا دوونیایه، هەموو گەلی کوردستان شانازی پێوه بکەن و به ئاواتەوە لاپەڕەکانی مێژووی شکۆمەندی و سەربڵندی بۆ نووسینەوه.
هەر بۆیه ئەرکی سەرشانی هەموو پارت و کۆمەڵ و رێکخراو و چین و توێژ و کەسێکه، که لەسەر ئەم خاکه پیرۆزە دەژین، یادی بکەنەوه و ئاهەنگی له دایکبوونی بگێڕن و پەیمان تازه بکەنەوه، که هەرگیز و هەرگیز رێبازی پارتی و بارزانیی نەمر بەرنەدەن…..
ئەڵبەته ئەم یادکردنەوه بەشێکه له وەفاداری بەرابەر بەو رێبازە نەپساوەیه و وەفادارییه بەرامبەر بەو کەسەی، که ئەرکی ڕابەرایەتی و خەباتی گرتە ئەستۆ و هەمیشه قوربانی لەپێناوی دەدا .
ئیسماعیل کامل
سەرۆکی کۆنفیدراسیۆنی ڕەوەندی کوردستانی
