کۆنفیدراسیۆنی رەوەندی کوردستانی، بەبۆنەی هاتنەوەی جەژنی نەورۆز و سەری ساڵی نوێی کوردی، پەیامێکی بڵاو کردەوه، که جەژنی نەورۆز لە هەر چوار پارچەی کوردستان و کوردستانییانی دیاسپۆرا پیرۆز دەکەن.
بە بۆنەی جەژنی نەورۆز و سەری ساڵی تازەی كوردی، بەناوی خۆم و کۆنفیدراسیۆنی ڕەوەندی کوردستانی، گەرمترین پیرۆزبایی ئاڕاستەی خانەوادەی سەربەرزی شەهیدان و پێشمەرگە قارەمانەکان و هاووڵاتییانی خۆشەویستی کوردستان لە ناوخۆ و دیاسپۆرا و تەواوی پارچەکانی کوردستان دەکەین، هیوادارین هەمووان پێكەوە لەگەڵ خۆشەویستان و ئازیزانیان جەژنێكی خۆش لە ئارامی و سەقامگیریدا بەسەر ببەین.
کۆنفیدراسیۆنی رەوەندی کوردستانی لە دیاسپۆرا، کە وەک یەکێک لە دامەزراوەکانی کورد و کوردستانییان، کار و چالاکییەکانی لەپێناو پاراستنی نەریتە کوردەوارییەکان لە دیاسپۆرا دەکات، ئامانجی هەرە گەورەی ئەوەیە بە بەرزترین ئاست جەژنی نەورۆز بخاتە بەرچاوی جیهان، ئەم جەژنە تایبەتمەندییەکی نەتەوەیی و کەلتووری بۆ گەلی کورد و کوردستانییان هەیە لە دیاسپۆرا.
بە درێژایی مێژوو، نەورۆز بۆ گەلی کوردستان سیمبولی خۆڕاگری و بەرەنگاربوونەوەی ستەم و زۆرداری و درێژەدان به خەبات و ئازاديی و ڕزگاربوون بووە، دیاسپۆراش بووەتە گۆڕەپانێکی دیکەی فراوانی خەباتی سیاسیی گەلی کوردستان و لەوێوە دەنگ و دۆزی کورد بەهێزتر دەگاتە ناوندە گرنگەکانی جیهان، لەو نێوەندانە، دلێرانە هەموومان لە هەر چوار پارچەی دابەش کراو، بە یەک ڕەنگ و یەک دەست داوای هەموو ئەو مافانە دەکەین، کە لەژێر زەبر و ستەمدا چەنین ساڵە لێی بێبەشکراوین لەگەڵ ئەوەی بە هەر گەل و میللەتێکی دونیا بەخشراوە.
جەژنی نەورۆز، کە بە یەکێک لە کۆنترین و گرنگترین جەژنەکانی نەتەوەی کورد دادەنرێت، هەموو ساڵێک لە ٢١ی ئازار بە شێوەیەکی بەرفراوان لە هەموو ناوچەکانی کوردستان و لەناو کوردەکانی دەرەوەی وڵات و ناوخۆی وڵاتەکەمان جەژن دەگێڕدرێت. نەورۆز تایبەتمەندییەکی مەزنی هەیە وەک هێمایەک بۆ ڕزگاربوون و ڕاپەڕین و بەرەوپێشچوونی نەتەوەی کورد، هاوکات ئاماژەی ژیانەوەشە.
باشووری کوردستان هەر لە مانگی ئاداردا بڵێسەی ڕاپەڕینی هەڵگیرساند و دژی ڕژێمی بەعس وەستایەوە و شارەکانی ڕزگار کرد، ئێستاش لە سایەی ئەو ئازادییەیە بۆتە لانکەیەک بۆ پێکەوەژیانی هەموو پارچەکانی کوردستان.
ڕۆژئاوای کوردستان، کوردەکان ئێستا هێز و پێگەیەکی مەزنیان تۆمارکردووە و خۆشبەختانە لە ڕووی سیاسییەوە وەک ناوەندێگی گرنگ هەژمار دەکرێت. ساڵانێکە لە کەشێکی ئازاددا ئاهەنگی نەورۆز دەگێڕن.
باکووری کوردستان، بەردەوام لە ژێر فشاری سیاسیدا دەجەنگێ، لە ململانێی سیاسی و فەرهەنگی و کەلتووری و زمانی دایک بە بەردەوامی دژیان هەیە، بەڵام هەموو ئەوانە بوونەتە هەوێنی مانەوەیان و ئەم ساڵ جیاوازتر لە ساڵانی ڕابردوو پێشوازی لە جەژنی نەتەوەیی دەکەن، هەروەها هەنگاوەکانی پڕۆسەی ئاشتی و ئەو گۆڕانکارییە سیاسییەی، کە هاتۆتە کایەوە، دروشمی ئاشتی و ئازادیی دەبێتە سیمبولی ئاهەنگگێڕان بۆ کوردەکان.
ڕۆژهەڵاتی کوردستان، بەشێکی گرنگیی خاکی کوردستانە و کەرنەڤاڵی جەژنی نەورۆز بە شێوەیەک بەڕێوە دەچێت، کە ئاوێتەی دڵ و رۆحی ئامادەبووان دەبێت.
لەو جەژنەدا، دووپات لە یەکڕیزی و تەبایی و ڕێکخستنی ناوماڵی کورد لەپێناو گەیشتن بە ئامانجە باڵاکانی میللەتەکەمان دەکەینەوە، بەڵێنی پاراستنی بەها بەرزەکانی وڵات و نیشتمان دەدەین، سۆزی پاراستنی شوناس و زمانی کوردی و دروستکردنی نەوەیەکی نیشتماندۆست دەدەین.
بەو بۆنەوە، داوا لە هەمووان دەکەین لەو ئاهەنگە بەرفراوانەی جەژنی نەورۆز بە جلی کوردی و مەشخەڵی نەورۆز ئامادە بن، کە لە شاری کۆڵنی ئەڵمانیا بۆ تەواوی کوردستانییان ڕێک دەخرێت.
دووبارە جەژنی نەورۆز لە هەموو کوردستانییان پیرۆزبێت و وڵاتمان هەر ئاوەدان و پڕ گوڵ بێ.
ئیسماعیل کامل
سەرۆکی کۆنفیدراسیۆنی ڕەوەندی کوردستانی
٢١ی ئازاری ٢٠٢٥
