ئاگادارتان دەکەینەوە کە لە چوارچێوەی یاداشتی لێکتێگەیشتنی (کۆنفیدراسیۆنی ڕەوەندی کوردستانی) و (وەزارەتی پەروەردەی حکومەتی هەرێمی کوردستان).
لە پێناو هاوکاری و پاڵپشتی بۆ مامۆستایان و قوتابخانە کوردییەکان، لە خەمخۆریمان بۆ منداڵانی کورد و داهاتووی خوێندنی زمانی کوردی لە تەواوی ئەوروپا و ئەمریکا و کەنەدا، وەزارەتی پەروەردە هەڵدەستێ بە چاپکردنی پەرتوکی مەنهەجی خوێندن بۆ هەموو قوتابخانەکانی خوێندنی کوردی لە دەرەوەی وڵات، بە هەردوو شێوەزاری سۆرانی و کرمانجی، بە هەردوو پیتی ئارامی و لاتینی. وەزارەتی پەروەردە ئەرک و خەرجی چاپ کردن و گواستنەوەی کتێبەکان تا ناو قوتابخانەکانتان لە ئەستۆ دەگرێت.
بۆ ئەم مەبەستە لە ژێر چاودێری (کۆنفیدراسیۆنی ڕەوەندی کوردستانی) و بەناوی (فیدراسیۆنی نێودەوڵەتیی زمانی کوردی) داوا لە سەرجەم مامۆستایان و کۆمەڵە و دامودەزگاکانی خوێندن و قوتابخانەکانی خوێندنی زمانی کوردی دەکەین لە هەموو ئەوروپا و ئەمریکا و کەنەدا، بە زووترین کات پەیوەندیمان پێوە بکەن بۆ تۆمارکردنی ناوی قوتابخانەکان تا لە وەرزی هاویندا کتێبەکان بگاتە دەستتان.
ئێمە خۆمان بە بەرپرسیار دەزانین لە یارمەتیدانتان لەم ئەرکە پیرۆز و نیشتمانییەدا، کە پاراستن و پێشخستنی خوێندنی زمانی کوردیە.
(زمانی کوردی ناسنامەی ئێستا و داهاتوومانە)
پەیوەندی بە فیدراسیۆنی نێودەوڵەتیی زمانی کوردی بکەن لە ڕێگەی ئەم ژمارە تەلەفۆنانە:
٩٦٤٧٥٠٤٦٤٦٠٩٠+
٤٦٧٢٣٢٦٢٤٠٤+
فیدراسیۆنی نێودەوڵەتیی زمانی کوردی
١٥ ی نەورۆزی ٢٧٢٥ کوردی
