کۆنفیدراسیۆنی ڕەوەندی کوردستانی، بە بۆنەی ٣٦هەمین ساڵیادی تیرۆرکردنی دکتۆر قاسملوو، بەیاننامەیەکیان بڵاو کردەوە، کە تێیدا هاتووە، «کۆنفیدراسیۆن، وێڕای ناردنی سڵاو و دروود بۆ گیانی هەمیشە پاقژی دکتۆر قاسملووی سەرکردە و سەرجەم شەهیدانی رێگای رزگاریی کوردستان، لەسەر رێباز و رێگای پڕ شانازییان تاکوو سەرکەوتن پێداگری دەکاتەوە».
دەقی بەیاننامەکە:
بەیاننامەیەک بە بۆنەی ٣٦هەمین ساڵیادی تیرۆرکردنی شەهید د. قاسملوو و هاوڕێكانی
رەوەندی كوردستانی
کوردستانییانی بەرێز
وەکوو هەموو لایەکمان دەزانین ئەمڕۆ ٣٦ساڵ بەسەر تیرۆرکردنی ڕێبەری ناوداری كوردستان، د. قاسملوو و هاوڕێکانی لە ڤییەنای پایتەختی نەمسا تێپەڕ دەبێ.
تیرۆرکردنی د. قاسملوو لەسەر مێزی دیالۆگ بۆ چارەسەرکردنی پرسی کورد لە رێگای ئاشتیی خوازانەوە، کردەوەیەکی هەرە نامرۆڤانە و لە هەمان کاتدا تیرۆریزمی دەوڵەتییە و سەلمێنەری ناوەرۆکی دژی کوردی دەسەڵاتدارانی تارانە دژ بە گەلە خەباتگێڕەکەمان.
لە كاتێكدا بە رێزەوە یادی ئەو سەركردە تێكۆشەرە رێز لێ دەگرین، بە روونی دەبینین، کە خەڵكی ڕۆژهەڵاتی كوردستان و گەلانی ئێران بە وتنەوەی دروشمی ژن، ژیان، ئازادی و قاسملوو قاسملوو ڕێگات درێژەی وەفاداری خۆیان بە رێبازی ئازادی و تێکۆشان تاکوو سەرکەوتن لە رێبازی شەهیداندا دووپات دەکەنەوە.
.
كۆنفیدراسیۆنی ر
ڕەوەندی کوردستانی،لەگەڵ ناردنی سڵاو و دروود بۆ گیانی هەمیشە پاقژی دکتۆر قاسملووی سەرکردە و سەرجەم شەهیدانی رێگای رزگاریی کوردستان، لەسەر رێباز و رێگای پڕ شانازییان تاکوو سەرکەوتن پێداگری دەکاتەوە
.
بەرزو بە رێز بێ یاد و بیرەوەریی شەهیدی سەرکردە دکتۆر قاسملووی نەمر
شەکاوە بێ ئاڵای خەباتی رزگارییخوازانەی کوردستان
ئیسماعیل کامل
سەرۆکی کۆنفیدراسیۆنی ڕەوەندی کوردستانی
١٣ی جولای ٢٠٢٥