بەرپرسی ئۆفیسی پەیوەندییەکانی کۆنفیدراسیۆنی رەوەندی کوردستانی، سەردانی زانکۆیەکی گرنگی کەنەدای کرد، و لەگەڵ تیمێکی ناوەندی زانستی و ئەکادیمی میسیساگا گفتوگۆی لەسەر پەرەپێدانی زانستی نێوان کەنەدا و هەرێمی کوردستان کرد.
مستەر كورد، بەرپرسی ئۆفیسی پەیوەندییەكانی كۆنفیدراسیۆنی ڕەوەندی كوردستانی، بەیاوەری هاشم سندی كوردینایتۆری پەیوەندییە ئابوورییەکان ، لە درێژەی گەشتەكەیان لە كەنەدا، لە ناوەندی زانستی و ئەکادیمیای میسیساگا، لەگەڵ تیمێكی ناوەندەکە بە سەرپەرشتی فانگ لیو خاوەن و بەڕێوەبەری جێبەجێكاری ناوەندەكە كۆبوونەوە.
سەرەتا فانگ، كورتەیەكی دەربارەی ناوەندەكەیان و سیستەمی خوێندن لە كەنەدا پێشكەش كرد. لەم بارەوە باسی لەوە كرد، کە ئەرکی ئەوان ئیلهامبەخشین و بەهێزکردنی خوێندکارەکانیانە لە ڕێگەی پڕۆگرامێکی ئەکادیمیی باش و پابەندن بە دابینکردنی ژینگەیەکی فێرکاری ئەمڕۆیی.
دواتر مستەر كورد، سوپاسی ئەو پێشوازییە گەرمەی كرد و بە وردی پەرژایە سەر ئەو راستییە، كە بزووتنەوەی نەتەوەیی و رزگاریخوازانەی کوردستان، هەموو كات گرنگی بە خوێندن و زانست داوە و تەنانەت لە شاخ و لە دژوارترین دۆخەكاندا لەم پرسە غافڵ نەبووە.
پاشان باس لەو ڕێگایانە كرا، كە دەكرێ پەیوەندیی زانستی و ئاڵوگۆڕی قوتابی لە نێوان كوردستان و كەنەدا پەرەپێبدرێ، لەو بارەوە چەند پێشنیار و بیروڕایان لەسەر ئاڵوگۆڕ كرا.
لە بەشێكی دیكەی گەشتەكەیدا، شاندی كۆنفیدراسیۆن سەردانی زانكۆیەكی گرنگی شاری تورۆنتۆیان كرد و لە نزیكەوە لەگەڵ د. فەریدوون رەحمانی مامۆستا و نووسەر لە زانكۆی یۆڕك كۆبوونەوە و سەبارەت بە ڕۆڵ و پێگەی رەوەندی كوردستانی، هەڵبژاردنی پەرلەمانی كەنەدا و داهاتووی پەیوەندییەكانی نێوان ئەو وڵاتە و كوردستان دیدی خۆیان خستە ڕوو.
هەروەها لەسەر هەنگاونان بۆ چەند پڕۆژەیەك بەمەبەستی خزمەتكردن بە پێشخستنی پەیوەندیی زانستی كەنەدا و كوردستان قسەیان كرد.
جێیباسە، سەرجەم لایەنەكان وێڕای بەرزنرخاندنی كار و پڕۆژەكانی كۆنفیدراسیۆن، ئەو جۆرە دیدار و بەسەركردنەوانەیان بە باش و پێویست لێكدایەوە.