پارتى داد و گەشەپێدانى تورکیا لەبەر ئاستەنگەکانى بەردەم هەڵبژاردنەوەى ئەردۆغان بۆ خولێکى دیکەى سەرۆکایەتى، دەیەوێت گۆڕانکارى لە سیستمى سەرۆکایەتیدا بکات.
موراد گەزیجى، سەرۆکى کۆمپانیاى گەزیجى بۆ راپرسى و لێکۆڵینەوە، لەبەرنامەیەکى تەلەفزیۆنیدا رایگەیاند: ئاکپارتى گەیشتۆتە ئەو باوەڕەى کە سیستەمى (50+1)، ئاستەنگى گەورە بۆ دوبارە هەڵبژاردنەوەى رەجەب تەیب ئەردۆغان لە هەڵبژاردنى داهاتودا دروست دەکات.
وتیشى،” ئاکپارتى لەبەرنامەیدایە لە مانگى (3 بۆ 4)ى ساڵى داهاتو، بەرێگاى ئەنجامدانى ریفراندۆم گۆڕانکارى لە دەستور و یاساى هەڵبژاردن بکات و رێژەى پێویستى دەنگ بۆ هەڵبژاردنى سەرۆک کۆمار کەم بکات.
سەرۆکى کۆمپانیاى گەزیجى رونی کردەوە، ئەکپارتى دەیەوێت رێژەى دەنگى پێویست بۆ هەڵبژاردنى سەرۆک کۆمار لە (50+1)ەوە، کەم بکاتەوە بۆ (40+1)، لەگەڵ ئەوەشدا سیستمى سەرۆکایەتى بۆ نیو سەرۆکایەتى بگۆڕێت.
ئەوە لە کاتێکدایە، چەند رۆژێک پێشتر، ئەردۆغان و چەند بەرپرسێکى دیکەى ئاکپارتى رایانگەیاندبو کە سیستمى (50+1) بۆ هەڵبژاردنى سەرۆک کۆمار ئاستەنگى گەورە دروست دەکات