رێکخراوی بزاڤی ئاشتی ناوخۆیی بە بۆنەی جەنگی نێوان رووسیا و ئۆکرانیا پەیامێکیان ئاڕاستەی نەتەوە یەکگرتووەکان کردووە و، داوا دەکەن لە رێی گفتوگۆوە کێشەکان چارەسەر بکەن.
دەقی پەیامەکە:
بە ناوی خوای بەخشندە و سەرچاوەی ئاشتی و میھرەبانی
بۆ بەڕێز ڕێکخراوی نەتەوە یەکگرتووەکان
ئێمە وەک ڕێکخراوێکی چالاکی بواری ئاشتی و برایەتی فەرھەنگی جەنگ و توندوتیژی و خوێنڕێژی، لە ڕێی ئێوەی بەڕێزەوە وەك ڕێکخراوێکی جیھانی بۆ پاراستنی ئاشتی و ئارامی نێودەوڵەتی و برایەتی نێوان گەلان و، ڕێگری لە دەستدرێژی دەوڵەتان بۆ سەر یەکتر و کردەی دوژمنکاری ڕەت دەکەینەوە و، دەنگی خۆمان دەخەینە پاڵ دەنگی ھەموو ئەو ئاشتی خواز و مرۆڤ دۆستانەی جیھان بۆ ڕاگرتنی ھێرشەکانی ڕوسیا بۆ سەر ئۆکرانیا، کە مەرگەساتی گەورەی لێکەوتۆتەوە. ھەروەها جاڕدانی ئاگربەست و چارەسەری کێشەکان لە ڕێی گفتوگۆ و ڕێککاری ئاشتی و دانوستانی سیاسییەوە.
بە تایبەتیش کە جەنگەکە تەنھا لەو خوێنڕێژییەی ئێستادا کورت نابێتەوە و ناوەستێت، وە مەترسی گەورەبوونی لێدەکرێت و بە کردار بۆتە ھەڕەشەیەکی گەورە بۆ سەر ئاسایش و سەقامگیری هەموو جیھان.
ھیوادارین ڕۆڵی نەتەوە یەکگرتووەکانیش لەم ڕوەوە گەورەتر و کاراتر بێت و، ھەمووان ڕێز لەم مەرجەعیەتە جیھانییە گەورەیە بگرن.
لەگەڵ ڕێزماندا
بزاڤی ئاشتی ناوخۆیی
ھەرێمی کوردستانی – عێراق
