ئالێکساندەر بێسپالۆڤ فەرماندەی سوپای ڕووسیا لە ئۆکرانیا کوژرا
ڕووسیا ڕووبەڕووی زیانێکی هێندە گەورە بووەتەوە کە لە پلانەکانیدا بۆ ئەنجامدانی هێرشی سەربازی بۆ سەر ئۆکرانیا بە هیچ شێوەیەک بیری لێنەکردبووەوە و لە دوایین پێشهاتیشدا ڤلادمێر پۆتین سەرۆکی ڕووسیا نۆیەمین فەرماندەی سوپاکەی لە ئۆکرانیا لەدەستدا.
ئالێکساندەر بێسپالۆڤ فەرماندەی یەکەی تانکی سوپای ڕووسیا لە لایەن سوپای ئۆکرانیاوە کوژرا، کەلەلایەن خوشکەکەیەوە پشتڕاست کرایەوە.
فەرماندەیی گشتی هێزە چەکدارەکانی ئۆکرانیا ڕاگەیەندراوێکی سەبارەت بە زیانەکانی سوپای ڕووسیا لە کاتی دەستپێکردنی هێرشی سەربازی بۆ سەر ئۆکرانیا لە ٢٤ی شوباتەوە هەتا ٩ی نیسان بڵاوکردەوە و تێیدا ئاماژەی بۆ ئەوە کرد کە لەو ماوەیەدا ١٩ هەزار و ١٠٠ سەربازی سوپای ڕووسیا کوژراون. جگە لەوە ٧٠٥ تانکی سەربازی، ١٨٩٥ ئوتومبێلی زرێپۆش، ٣٣٥ سیستەمی تۆپهاوێژ، ١٠٨ سیستەمی موشەکی بە کۆمەڵ، ٥٥ سیستەمی بەرگری ئاسمانی، ١٥١ فڕۆکەی جەنگی و ١٣٦ هەلیکۆپتەری ڕووسیا لە لایەن سوپای ئۆکرانیاوە تێکشکێندراون. جگە لەوە هێزەکانی ڕووسیا ٧ کەشتی جەنگی و ١١٢ فڕۆکەی بێفڕۆکەوانی لەدەستداوە.
هەرچەندە ڕووسیا بە تەواوی دان نانێت بەو زیانانەی لە لایەن ئۆکرانیاوە بڵاوکراونەتەوە، بەڵام چیتر ناتوانێت نکۆڵی لە زیانە گەورەکانیان بکات. دیمیتری پێسکۆڤ وتەبێژی کۆشکی کرێملینی ڕووسیا لە چاوپێکەوتنێکیدا لەگەڵ تەلەڤیزیۆنی Sky News دانی بەوەدا نا کە لە جەنگی ئۆکرانیادا زیانی گەورەیان بەرکەوتووە و ئەوەشی بە تراژیدیایەکی گەورە بۆ بۆ ڕووسیا ناوبرد.
