كۆمەڵەی دەم كورد سەردانی ناوەندی رەوەندی کوردستانی لە ئەڵمانیا دەكات
شاندێكی كۆمەڵەی دەم كورد، (كات كورد)، سەردانی بارەگای سەرەكی ناوەندی رەوەندی كوردستانیان لە ئەڵمانیای كرد و، گفتوگۆیان لە بارەی كاری هاوبەش و پێکەوەیی كرد.
شاندی كۆمەڵەی دەم كورد، پێكهاتبوون لە هەریەكە لە زیوەر ئەسلان و توران دەمیركول و، لەلایەن بەرپرسی ناوەندی رەوەندی كوردستانی لە ئەڵمانیا، كەژاڵ دەروێش و ئەندامی دەستەی بەڕێوەبەری ناوەندەكە، شەڤین حاجۆ پێشوازییان لێكرا.
لە دانیشتنەكەدا هەردوولا گفتوگۆیان لەبارەی رەوشی رەوەندی كوردستانی لە ئەڵمانیایان کرد، هاوکات باسیشیان لەسەر چالاكی و پڕۆژەكانی داهاتوو کرد.
جێی باسە، لە كۆتاییدا هەردوو لا هاوڕابوون بۆ بەردەوامبوونی پەیوەندییەكانی نێوانیان، ئەوەش بەمەبەستی هەماهەنگی و هاوكاریكردن لە هەندێك كاری پەیوەست بە كاروباری رەوەندی كوردستانی لە دەرەوە، تا بە هاوبەشی ئەنجامیان بدەن.