لەندەن – بەریتانیا
لە درێژەی کاروانە هونەرییەکانیدا لەسەر ئاستی جیهان، خانمە مۆسیقاژەنی کورد خەبات عەباس، بە ئامێرە تایبەتەکەی و بە شێوازێکی جیاواز لە ڕێساکانی مۆسیقای باو، گەشتێکی هونەری بۆ سێ وڵاتی ئەورووپا دەست پێ دەکات و زنجیرەیەک کۆنسێرت ساز دەکات.
گەشتە هونەرییەکان
بڕیارە خەبات عەباس، وەک ژەنیاری ئامێری چەلۆ، شانبەشانی چەندین مۆسیقاژەنی بەتوانای جیهانی، لە وڵاتانی بەریتانیا، دانیماڕک و ئەڵمانیا بەشداریی چەندین کۆنسێرت بکات،بەگوێرەی بەرنامەی ڕاگەیەندراو، سبەی 4ی ئادار لە لەندەن یەکەم کۆنسێرت ساز دەکرێت، دواتر لە 13ی ئادار دەچێتە دانیماڕک و دواجار لە 19ی ئادار لە بەرلینی پایتەختی ئەڵمانیا کۆتایی بە گەشتەکەی دەهێنێت.
ناوەڕۆک و فەلسەفەی کارەکان
ئەمڕۆ سێشەممە 3ی ئاداری 2026، ئەو هونەرمەندە کوردە وردەکاریی بەشدارییەکەی بۆ میدیاکان ئاشکرا کرد و ڕوونی کردەوە، لەم گەشتەدا بە سۆڵۆیەکی تایبەت بەخۆی دەردەکەوێت، ئامانجی سەرەکیی ئەو لەم کۆنسێرتانەدا، جووڵانەوەیە بە ئازادی لە نێوان هونەری دیاریکراو و ئەگەرە نوێیەکاندا، ناوبراو لە کارەکانیدا پشت بە شێوازی دەنگی کەنارەکان (Shores) دەبەستێت بۆ گێڕانەوەی چیرۆکەکان و گەڕان بەدوای ئەو دەنگ و شوێنانەی تا ئێستا نەبیستراون و نەدۆزراونەتەوە.
تەکنیک و سەرچاوەی ئیلهام
خەبات عەباس کە بە بەکارهێنانی چەلۆی دەستکاریکراو و تەکنیکە فراوانەکان ناسراوە، ئاماژەی بەوە کرد، پارچە مۆسیقاکانی هەڵقوڵاوی دۆخە هەنووکەییەکان و یادەوەرییەکانی سەردەمی منداڵین، لە ڕێگەی کارەکانییەوە پرسیار لەبارەی ئەو سنوورانە دەکات کە لە دەرەوەی چوارچێوە باوەکانن و هەوڵ دەدات ئەو دەنگانە بخاتە ڕوو کە کۆنترۆڵکردنیان ئەستەمە، ئەمەش وەک دەرچوونێک لە دژی بەها و ڕێسا کۆنەکانی مۆسیقا تەماشا دەکرێت.
خەبات عەباس، ژەنیاری ئامێری چەلۆ و خەڵکی شاری سلێمانییە، ئێستا نیشتەجێی بەریتانیایە، ناوبراو خاوەنی ئەزموونێکی دەوڵەمەندە و بەشداریی چەندین فێستیڤاڵ و کۆنسێرتی نێودەوڵەتی کردووە و چەندین خەڵاتی تایبەتی بەدەست هێناوە، ئەمەش پێگەی ئەوی وەک مۆسیقاژەنێکی جیهانی و خاوەن ستایلی تایبەت جێگیر کردووە.