بەهۆى پێکانەکانیەوە، پاریس سان جێرمان بیر لە هەڵوەشاندنەوەى گرێبەستەکەى سێرجیۆ ڕامۆس دەکاتەوە.
ڕۆژنامەى لۆ پاریسیانى فەڕەنسى ئاشکرایکردووە، بەرپرسانى یانەى پاریس سان جێرمان، بیر لە هەڵوەشاندنەوەى گرێبەستەکەى ڕامۆسى بەرگریکارى یانەکەیان و کاپتنى پێشووى یانەى ڕیاڵ مەدرید دەکەنەوە و، پێیانوانییە ڕوودانى ئەمە سیناریۆیەکى ناخۆش یان خراپ بێت.
ڕۆژنامەکە ئاماژەى بەوەکردووە، دەستەى خزمەتگوزارى پزیشکى یانە پاریسیەکە، کەمێک گومانى هەیە و دڵنیانییە لەوەى ڕامۆس بگەڕێتەوە بۆ کێبڕکێکان بە هەمان خیرایى و ئاستەوە، کە لە ڕیاڵ مەدریددا هەیبووە.
باسى لەوەشکردووە، لە ئەگەرى هەڵوەشاندنەوەى گرێبەستەکەى ڕامۆس، پاریس دەبێت لەگەڵ بەرگریکارەکە ڕێکبکەوێت، کە گرێبەستەکەى لە هاوینى 2023دا تەواودەبێت.
ڕامۆسى 35 ساڵ لە هاوینى ڕابردوودا بەبێ بەرامبەر پەیوەندى بە پاریسەوە کرد، دواى ئەوەى گرێبەستەکەى لەگەڵ ڕیاڵ مەدرید نوێنەکردەوە، بەڵام بەهۆى پێکانەوە نەیتوانیوە هیچ یارییەک بۆ یانە نوێکەى بکات.