Qehreman Osman, Berpirsê Nivîsîngeha Şifa Barzanî, Serpereştyarê Giştî yê Revenda Kurdistanî li Diyasporayê, bi hevrêtiya Memê Memoyî, Serokê Federasyona Şingalê û Dr. Heval Mehdî Nizarkî, Berpirsê Tora Xwendekarên Kurd li Rûsyayê, du hevdîtinên cuda ligel xwendekarên Kurd û nûnerên civaka Kurdên Rojava encam dan.
Di vê hevdîtina ku li Rûsyayê hate lidarxistin de, behsa karname û çalakiyên Nivîsîngeha Diyasporayê li Baregeha Barzanî û Konfederasyona Revenda Kurdistanî hate kirin.
Mijara sereke ya gotûbêjan taybet bû bi çawaniya xizmetkirina Kurdên diyaspora û giringîdana zêdetir bi ziman, nasname û kultura Kurdî, wek beşekî girîng ji stratejiya xebata Konfederasyonê bo yekxistina şiyanên Kurdan li derveyî welat.
Amadebûyên hevdîtinê ji xwendekaran û revenda Kurdî, digel derbirîna kêfxweşî û pêşwaziya germ ji bo wan pêngavan, tekezî li ser giringiya xebat û karên Konfederasyonê kirin, her wiha soz dan ku wek beşekî çalak, piştgirî û beşdariya tevahî di proje û çalakiyên neteweyî de bikin ku armanc jê bihêzkirina pêgeha Kurdan e li Rûsyayê.
Ev cure civîn di çarçoveya hewldanên berdewam ên Baregeha Barzanî û Nivîsîngeha Şifa Barzanî de tên ji bo avakirina pireke peywendiyê di navbera niştiman û revenda Kurdistanî de li hemû cîhanê, armanc jî ji wan civîn û çalakiyan, rêkxistina navxweyî ya Kurdên diyasporayê û parastina kultura neteweyî ye li hember astengiyên derve, hevdem ligel dabînkirina piştgiriyê bo xwendekaran û revenda Kurdistanî li welatên diyasporayê.
