Lord Maurice Glasman, endamê Encûmena Lordan a Brîtanyayê û kesayetiyekî naskirî yê qada siyasî ya wî welatî, bi formaya Amedsporê derket û piştgiriya xwe ji bo yaneyê anî ziman.
Glasman ragihand ku bi kêfxweşî piştgiriya Amedsporê dike, di heman demê de di dema derketina xwe ya bi cilên Amedsporê de got: “Bi dil û can piştgiriya Amedspor û Tottenhamê dikim”.
Lord Glasman li Brîtanyayê wek alîgirekî dilsoz ê Tottenham Hotspur tê naskirin, lê belê derketina wî bi cilên Amedsporê bûye cihê balkişandina medya û alîgirên futbolê.
Ev pengav wek nîşanek ji bilindbûna nav û dengê Amedsporê li derveyî Tirkiyeyê û bi taybetî li Ewropayê tê nirxandin.
Amedsporê di salên borî de bi saya çalakiyên xwe yên werzişî û berfirehbûna bingehê alîgirên xwe, karîbûye bala civaka futbolê û bi taybetî civaka Kurd a li Ewropayê bikişîne ser xwe.