فیدراسیۆنی رەوەندی کوردستانی- بە تیپێکی تۆپی پێ بەشداری خولێک دەکەن، کە ساڵانە بۆ کۆمەڵگە و کەلتوورە جیاوازەکان بەڕێوە دەچێت.
فیدراسۆنی رەوەندی کوردستانی-هۆلەندا بە هەماهەنگی لەگەڵ رێکخراوی وەرزشیی رەوەندی کوردستانی KD Sport، بە فەرمیی دەستیان بە ڕاهێنانی تیمەکەیان کرد بە مەبەستی خۆئامادەکردنیان بۆ خولی نێودەوڵەتیی تۆپی پێ بەناونیشانی: دۆستایەتیی نێوان کەرلتوورەکان.
ئەو خولە وەرزشییە تایبەتە بە کۆمەڵگە و کەلتوور و نەتەوە جیاوازەکان، کە لە ڕێگەی تۆپی پێ کۆیان دەکاتەوە.
فیدراسیۆنی رەوەندی کوردستانی-هۆڵەندا، بە هەماهەنگی لەگەڵ رێکخراوی وەرزشی دیاسپۆرا سپۆرت KD Sport، بەشانازییەوە بەشداری ئەو خولە دەکات و کۆمەڵگەی کوردی بە هەستکردن بە پابەندی و ڕەفتاری وەرزشیی نوێنەرایەتیی دەکات.
جێی خۆشحاڵییە، کە وەرزشی ڕەوەندی کوردستانی لە خولی نێودەوڵەتیی دۆستانەی تۆپی پێی ساڵی ٢٠٢٦، بە دوو تیپی وەرزشیی بەشداری دەکات.
تیپەکان لە یاریزانانی بەهرەمەند و پڕ لە ئیرادە پێک هاتوون، کە بە هەموو توانایانەوە خۆیان ئامادە دەکەن.
ئامانجی وەرزشی ڕەوەندی کوردستانی تەنیا بەدەستهێنانی سەرکەوتنی وەرزشیی نییە، بەڵکوو گەیاندنی پەیامی یەکگرتوویی، پەیوەندی و شانازییە لە ڕێگەی وەرزشەوە، تیپەکان دەیانەوێت گەنجان کۆ بکەنەوە، پشتگیریی بەهرەمەندان بکەن و ناسنامەی کوردی بە شێوەیەکی ئەرێنی لەناو ژینگەیەکی نێودەوڵەتی و فرەکەلتووریی پیشان بدەن.
جێی باسە، فیدراسۆنی رەوەندی کودستانی-هۆلەندا، داوا لە کوردانی دانیشتووی ئەو وڵاتە دەکات، کە وەک هاندەر، خۆبەخش، سپۆنسەر و هاوکاران پشتگیری تیپەکان بکەن، بەو پێیەی خولەکە ئامانجێکی مرۆییی هەیە، چونکە داهاتی پاڵەوانێتییەکە بۆ پشتگیری منداڵانی بێ باوک تەرخان دەکرێت.