بە مەبەستی ڕەخساندنی دەرفەتی باشتر بۆ فێربوونی زمان و خێراکردنی پڕۆسەی تێکەڵبوونی ڕەوەندی کوردستانی لە کۆمەڵگەی هۆڵەندیدا، فیدراسیۆنی دیاسپۆرای کوردستانی و دامەزراوەی فێرکاریی (سازلێرت) هەوڵەکانیان یەکدەخەن، ئەم هەنگاوە وەک پردێکی گرنگ بۆ پشتگیریکردنی تازەهاتووان و بەهێزکردنی پێگەی کورد لەو وڵاتەدا هەژمار دەکرێت.
شاندێکی باڵای فیدراسیۆنی دیاسپۆرای کوردستانی لە هۆڵەندا سەردانی دامەزراوەی سازلێرتیان کرد، بە مەبەستی لەنزیکەوە ئاگاداربوون لە چالاکییەکانیان و تاوتوێکردنی پەرەپێدانی پەیوەندییەکان لە بوارەکانی پەروەردە و تێکەڵبوونی کۆمەڵایەتیدا.
شاندەکە کە پێکهاتبوو لە خاتوو ڕێحان سەعید، سەرۆکی فیدراسیۆن، گۆهدار بۆتانی، جێگری سەرۆک، خاتوو ڕووناک فەتحۆڵازادە، بەرپرسی چالاکییەکان و مامۆستا دادەوان سولەیمان، لە لایەن بەڕێوەبەرایەتی سازلێرتەوە بە گەرمی پێشوازییان لێکرا.
لە دیدارەکەدا نوێنەرانی فیدراسیۆن لە نزیکەوە ئاشنای بینین و ستراتیژی کارکردنی ئەو دامەزراوەیە بوون، کە بە شێوەیەکی پیشەیی کار لەسەر فێرکردنی زمانی هۆڵەندی و پشتگیریکردنی پەنابەران و خێزانە تازەهاتووەکان دەکات، بۆ ئەوەی بتوانن بە شێوەیەکی سەرکەوتووانە لەناو کۆمەڵگەی نوێدا جێگەی خۆیان بکەنەوە.
لە بەشێکی دیکەی کۆبوونەوەکەدا، گفتوگۆیەکی چڕ و بەرهەمدار لەبارەی دەرفەتەکانی هاوکاریی دووقۆڵی لە داهاتوودا ئەنجامدرا، هەردوولا جەختیان لەسەر گرنگیی هەماهەنگی کردەوە لە بوارەکانی فێرکردن و پێشکەشکردنی هاوکاریی نیشتەجێبوون بۆ کوردانی نیشتەجێی هۆڵەندا.
شاندی میوان ستایشی کارە مرۆیی و زانستییەکانی سازلێرتیان کرد، بەتایبەت لە ڕەخساندنی ژینگەیەکی گونجاو بۆ خوێندکاران.
لەم چوارچێوەیەدا، فیدراسیۆنی دیاسپۆرای کوردستانی لە هۆڵەندا سوپاس و پێزانی خۆی ئاراستەی خاتوو سازان، دامەزرێنەر و بەرپرسی ڕێکخراوی سازلێرت کرد، بۆ ئەو میواندارییە دڵسۆزانەیە، چاوەڕوان دەکرێت ئەم دیدارە ببێتە سەرەتایەکی نوێ بۆ کارکردنی هاوبەش و درێژخایەن کە خزمەتێکی گەورە بە بەرژەوەندییەکانی تەواوی کۆمەڵگەی کوردستانی لە هۆڵەندا بگەیەنێت.
کارزان حەیدەر