لەگەڵ جیاکردنەوەی نزیکەی دوو ملیۆن دەنگ، هاوسەنگیی هێز لە هەڵبژاردنی پەرلەمانی سوێددا گۆڕانکاریی ڕیشەیی بەخۆیەوە بینی و بەرەی ئۆپۆزیسیۆنی چەپ بە ڕابەرایەتیی ماگدالینا ئەندەرسۆن، بە جیاوازییەکی زۆر کەم پێشەنگیی لە هاوپەیمانیی دەسەڵاتداری ڕاستڕۆ وەرگرتەوە.
داتاکانی دەستەی هەڵبژاردنەکانی سوێد ئاشکرای دەکەن کە لەگەڵ بەردەوامیی پرۆسەی ژماردن و تەواوبوونی 2,137 بنکە لە کۆی 6,626 بنکەی دەنگدان (کە دەکاتە 1,966,496 دەنگی بژێردراو)، بەرەی چەپڕۆ بە کۆکردنەوەی 49.3%ـی دەنگەکان توانیویەتی پێش بەرەی ڕاستڕۆ بکەوێتەوە، هاوکات هاوپەیمانیی ڕاستڕۆ بە سەرۆکایەتیی ئولف کریستەرسۆن ڕێژەی دەنگەکانی بۆ 49.2% دابەزیوە، ئەمەش ململانێیەکی توند و بێوێنە لەسەر بردنەوەی دەنگەکان پێشاندەدات، لەگەڵ ئەم جیاکردنەوە فراوانەی دەنگەکاندا، ڕێژەی بەشداریکردنی هاووڵاتییان بۆ 80.2% بەرزبووەتەوە.
دابەشبوونی دەنگە بەراییەکان و ئاستی گۆڕانکاریی پارتەکان بەراورد بە ساڵی 2022 بەم جۆرەیە:
- پارتی سۆسیال دیموکرات: 27.3% (پاشەکشەی بەرێژەی 3.0% کردووە)
- پارتی مۆدێرات (پارێزگاران): 19.6% (بەڕێژەی 0.5% زیادی کردووە)
- پارتی دیموکراتەکانی سوێد: 17.8% (پاشەکشەی 2.8%ـی بەخۆیەوە بینیوە)
- پارتی چەپ: 8.4% (هەڵکشانی بەرچاوی بەڕێژەی 1.7% تۆمارکردووە)
- پارتی نێوەڕاست: 7.3% (بەڕێژەی 0.6% زیادی کردووە)
- پارتی سەوز: 6.3% (بەڕێژەی 1.2% زیادی کردووە)
- پارتی کریستیان دیموکرات: 6.3% (بەڕێژەی 0.9% زیادی کردووە)
- پارتی لیبراڵەکان: 5.5% (بەڕێژەی 0.9% زیادی کردووە)
- پارتەکانی دیکە: 1.5%
نەخشەی نوێی هاوپەیمانێتییەکان:
سیستمی پەرلەمانی لە سوێد پشت بە پێکهێنانی هاوپەیمانێتی لە نێوان چەند پارتێک دەبەستێت بەمەبەستی دەستەبەرکردنی زۆرینەی یاسایی، کە گۆڕەپانی ئەم هەڵبژاردنە بە تەواوی لەنێوان دوو جەمسەردا یەکلایی دەبێتەوە:
بەرەی چەپڕۆ: گەڕانەوە بەرەو حوکمڕانی
ئەم بەرەیە کە ئێستا لە پێشەنگدایە، لە چوار پارتی سەرەکی پێکدێت و ماگدالینا ئەندەرسۆن سەرکردایەتیی دەکات، کۆڵەکەی سەرەکیی ئەم بەرەیە پارتی سۆسیال دیموکراتە، کە مێژووییترین پارتی سیاسیی وڵاتەکەیە، هاوشان لەگەڵ پارتی چەپی سۆسیالیست و پارتی ژینگەپارێزی سەوز. پارتی نێوەڕاستیش، کە ڕەگێکی میانڕەوی هەیە، لەم هاوپەیمانێتییەدا پێگەیەکی یەکلاکەرەوەی هەیە دوای ئەوەی هێڵی سیاسیی خۆی گۆڕی بۆ پشتیوانیکردنی چەپەکان بە ئامانجی دروستکردنی بەربەست لەبەردەم فراوانبوونی هەژموونی ڕاستڕۆیە تووندڕەوەکان.
بەرەی ڕاستڕۆ: لەژێر مەترسیی لەدەستدانی دەسەڵاتدا
ئەم هاوپەیمانێتییە پێکهێنەری حکومەتی ئێستایە و چوار پارت لەخۆدەگرێت بە ڕابەرایەتیی ئولف کریستەرسۆن، سێ پارتی تەقلیدیی راستڕۆ بریتیین لە مۆدێرات، کریستیان دیموکراتەکان و لیبراڵەکان کە پێکەوە کابینەی دەسەڵاتداریان دروستکردووە، لە بەرامبەردا، پارتی تووندڕەوی دیموکراتەکانی سوێد لە دەرەوەی کابینەی فەرمیی حکومەت ماوەتەوە، بەڵام وەک هێزی پارێزەری زۆرینەی پەرلەمانی لە پشتی ئەم هاوپەیمانێتییەوە دەوەستێت. بەپێی ئەم ئەنجامە نوێیانە، پێگەی بەرەی دەسەڵاتدار ڕووبەڕووی هەڕەشەیەکی ڕاستەقینەی لەدەستدانی کورسییەکانی بووەتەوە.