Federasyona Revenda Kurdistanî-Hollanda digel beşek ji xwendekar û ciwanên Kurd ên niştecihê wî welatî civiya, bi mebesta beşdarîkirina wan di bone û çalakiyên neteweyî yên Kurdî de.
Roja Yekşemê rêkefta 09-08-2026an, Federasyona Revenda Kurdistanî-Hollanda, li bajarê Rotterdamê civînek digel beşek ji xwendekar û ciwanên Kurd ên niştecihê wî welatî pêk anî, ku tê de behsa çend mijarên girîng ên girêdayî ciwanan, rola ciwanan di nav civakê de û plan û çalakiyên federasyonê hate kirin.
Civîn bi deqeyek bêdengî ji bo rêzgirtina ji giyanê pak ê şehîdên her çar perçeyên Kurdistanê dest pê kir.
Paşê, Rêhan Seîd berpirsê Federasyona Revenda Kurdistanî-Hollanda, behsa federasyonê û armanc û karên wê kir, herwiha plan û bernameyên federasyonê heta meha Kanûna vê salê xiste rû û tekez li ser berdewamiya kar û çalakiyan kir.
Di beşeke din a civînê de, Gohdar Botanî cîgirê berpirsê federasyonê, behsa kongreya federasyonê û rol û erkên wan û çalakiyan û awayê rêkxistina karên wan kir, hevdem amaje bi girîngiya beşdariya ciwanan da û tekez kir, ku federasyon herdem piştgiriya ciwanan dike û hewl dide derfetên zêdetir ji bo beşdarî û pêşkeftina wan birexsîne.
Paşê Salar Hecî berpirsê çalakiyên federasyonê, çend plan û ramanên xwe bo çalakî û bernameyên sala bê xistin holê û di vê beşê de behsa çawaniya beşdariya zêdetir û çalaktir a ciwanan di bernameyên paşerojê de kirin.
Paşê xwendekar û ciwanên beşdar nêrîn, boçûn, pêşniyar û pirsên xwe anîn holê û digel berpirsên federasyonê gotûbêja rasterast kirin.
Ev civîn beşek e ji hewlên federasyonê bo nêzîkkirina ciwanên Kurd û guhdarîkirina deng û pêşniyarên wan û berfirehkirina beşdariya wan di kar û çalakiyên civakî, çandî û neteweyî de.
Hêjayî gotinê ye, federasyon bawer dike ku ciwan hêzeke sereke ya paşeroja civaka Kurdistanê ne û beşdarî û şiyanên wan roleke girîng di bihêzkirina revenda Kurdistanî li Hollandayê û parastina têkiliya di navbera nifşê nû û niştiman de heye.