ئەمڕۆ هەینى بەلەمێكی پەنابەران لە دوورگەى پێنتی ئیتاڵیا پەکى كەوت و، لە لایەن پۆلیسى دەریاوانى ئەو وڵاتەوە پەنابەرە سەرنشینەكانی رزگار كران و دواتر دەستگیر كران، بڕیارە بۆ ماوەى 10 رۆژ پەنابەرەكان کەرەنتین بكرێن.
بە پێی زانیاری فیدراسیۆنى پەنابەرانى سەرانسەرى عێراق و هەرێمى کوردستان، سەر لە بەیانی ئەمڕۆ هەینى، بەلەمێک کە 200 پەنابەرى هەڵگرتبوو، لە دوورگەى پێنتی ئیتاڵیا پەکی دەكەوێت، دوای ئاگادارکردنەوەی رێکخراوی خاچی سووری نێودەوڵەتی، ئەوانیش پۆلیسی دەریاوانی ئیتاڵیا ئاگادار دەکەنەوە و بەهانایانەوە دەچن و رزگاریان دەکەن.
بە پێی زانیارییەکان، هەشت لەو پەنابەرانە هاووڵاتی هەرێمی کوردستانن، کە سێیان منداڵن، پەنابەرەکانی دیکەیش هاووڵاتییانی میسری و ئەفغانی و ئێرانیین، ئەوەشیان روون کردووەتەوە، کە دوای تەواوبوونی کەرەنتینەیان، چارەنووسی پەنابەرەکان دیاری دەکرێن.