بەبۆنەی 22ی نیسان، یادی 128 ساڵەی دەرچوونی یەکەم ڕۆژنامەی کوردی بە ناوی کوردستان و ڕۆژی ڕۆژنامەگەریی کوردی، گەرمترین پیرۆزبایی ئاراستەی سەرجەم ڕۆژنامەنووسان، نووسەران و ڕاگەیاندنکارانی کوردستان و ڕەوەندی کوردستانی لە سەرتاسەری جیهان دەکەین.
دەرچوونی یەکەم ڕۆژنامەی کوردی لە ساڵی 1898، لە شاری قاهیرەی پایتەختی میسر لەسەر دەستی میقداد میدحەت بەدرخان، پەیامێکی گەورە و واتادارە بۆ ئێمەی ڕەوەندی کوردستانی، ئەو ڕووداوە مێژووییە سەلمێنەری ئەو ڕاستییەیە، کە کوردانی تاراوگە لە هەر شوێنێکی ئەم جیهانە بن دەتوانن پێشەنگ بن و ڕۆڵی گەورە و کاریگەر لە پاراستنی زمان، کەلتوور، ناسنامە و خزمەتکردن بە دۆزی ڕەوای نەتەوەکەیان بگێڕن.
ئێمە لە کۆنفیدراسیۆنی ڕەوەندی کوردستانی، ئەم یادە شکۆدارە بەرز دەنرخێنین، کە قەڵەمە دڵسۆزەکان و ڕۆژنامەنووسانی کورد لە ناوخۆ و دەرەوەی نیشتمان بەردەوامن لە گەیاندنی دەنگی زوڵاڵی گەلەکەمان بە کۆمەڵگەی نێودەوڵەتی و بەرگریکردن لە مافە نەتەوەیی و نیشتمانییەکانمان، مێژوو گەواهیدەری ئەوەیە، کە ڕۆژنامەگەریی کوردی لە قۆناغە سەختەکاندا قوربانیی زۆری داوە و هەمیشە سەنگەری پێشەوەی بەرگریی بووە لە ڕاستی و ئازادی و هۆشیاریی نەتەوەیی.
لەم بۆنەیەدا، وێڕای دووپاتکردنەوەی پاڵپشتیی تەواوی کۆنفیدراسیۆنەکەمان بۆ ئازادیی ڕادەربڕین و کاری ڕۆژنامەوانیی پیشەیی سەردەمییانە، سڵاو و دروود دەنێرین بۆ گیانی پاکی سەرجەم ئەو ڕۆژنامەنووسانەی لەپێناو گەیاندنی ڕاستی و خزمەتکردن بە خاکی کوردستان گیانی خۆیان بەخشی.
پیرۆز بێت یادی ڕۆژنامەگەریی کوردی، هەمیشە سەرکەوتوو بن و قەڵەمەکانتان لە خزمەتی گەشەسەندن و یەکڕیزیی گەل و نیشتماندا بێت.
کۆنفیدراسیۆنی ڕەوەندی کوردستانی
22ی نیسانی 2026