بەڕێز ڕزگار ئالێ
کاندید بۆ پۆستی ئەندامی ئەنجومەنی شارەوانی لە ناوچەی بێسناڵ گرین ئیست
کۆنفیدراسیۆنی ڕەوەندی کوردستانی وەک دامەزراوەیەک کە خاوەندارێتی و نوێنەرایەتیی ڕەوەندی کوردی لە دەرەوەی وڵات دەکات، مایەی شانازییەکی گەورەیە بۆ ئێمە کە دەبینین ڕۆڵەیەکی نەتەوەکەمان، بەو پەڕی لێهاتووییەوە تێکەڵ بە پرۆسەی سیاسی و خزمەتگوزاری لە وڵاتێکی وەک بەریتانیا بووە، کاندیدبوونت بۆ پۆستێکی گرنگی وەک ئەندامی ئەنجومەنی شارەوانی، نیشاندەری توانای تاکی کوردە لە دیاسپۆرا و وێنەیەکی گەشی نەتەوەکەمانە لەو وڵاتەدا.
ئێمە بە وردی لە بەرنامە و بەڵێنەکانی هەڵمەتی هەڵبژاردنەکەتانمان بۆ ڕۆژی پێنجشەممە 7ی مایۆی 2026 ڕوانیوە، جێگەی دەستخۆشییە کە کارنامەیەکتان داڕشتووە کە بە تەواوی ڕەنگدانەوەی پێداویستییەکانی کۆمەڵگەی بەریتانییە.
گەیشتنی کوردێک بەم پێگەیە و پێشکەشکردنی خزمەتگوزارییەکان، ناوی کوردستان و ڕەوەندی کوردی لە دەرەوەی وڵات بەرزتر دەکاتەوە، وەک کۆنفیدراسیۆنی ڕەوەندی کوردستانی، بە هەموو توانامانەوە پاڵپشتیت دەکەین و هیوای سەرکەوتنی گەورەت بۆ دەخوازین لەم هەڵبژاردنەدا، تا ببیتە دەنگی زوڵاڵی هاووڵاتیانی ناوچەکەت و جێگەی شانازیی نەتەوەکەت.
کۆنفیدراسیۆنی ڕەوەندی کوردستانی
26ـی نیسانی 2026