ناوەندی ڕەوەندی کوردستانی-بێرمینگهام لەگەڵ چەند یانەیەکی وەرزشی کۆبونەوە ، یانەیەکیش ئامادەیی خۆیان دەربڕی، کە لە ژێر چەتری ناوەندەکەدا درێژ بە چالاکییە وەرزشییەکانیان بدەن.
ڕێکەوتی ٢٩/١٠/٢٠٢٤، ناوەندی ڕەوەندی كوردستانی-بێرمینگهام، لەگەڵ سەرۆكی هەر دوو یانەی وەرزشی ئەی ئێف سی ساندوێڵ یونایتد و یانەی نەورۆز و كۆمەڵێك لە وەرزشوانانی هەر دوو یانەكە لە وێست برۆمیچی شاری بێرمینگهام كۆبونەوە.
کۆبونەوەکە بە سەرپەرشتی فەرەیدون ڕەزا بەرپرسی ناوەندەکە و بە ئامادەبونی عادل خەیات بەرپرسی دارایی ناوەند بەڕێووەچوو، کە تێیدا تیشک خرایەسەر خۆڕێكخستنەوە و دروستكردنی بۆردێكی نوێ و كاری پێكەوەیی هەر دوو یانەكە.
لە كۆبونەوكەدا بیروڕای وەرزشوانان و بەڕێوەبەرانی یانەكان وەرگیران و ئامادەبووان بە پێشنیاری گونجاو كۆبونەوەكەیان گەرموگوڕتر كرد. دواجار بڕیار درا لە كۆبونەوەی داهاتوو هەر دوو سەرۆكی یانەكە ئامادە بن بۆ بڕیار دان لەسەر كاری پێكەوەیی و هاریكاریكردنی هەر دوو یانەكە.
هاوکات لەسەر بۆردی نوێی یانەكان گفتوگۆ كرا و بڕیاری داڕشتنی پلان و بەرنامەی كاری یانەكان بەشێكی تری كۆب
ونەوەكە بوو. هەروەها یانەی ساندوێلیش بڕیاریاندا، كە ئۆرگانێكی چالاكی ناوەندی ڕەوەندی كوردستانی-بێرمینگهام بن و بەردەوام بن لە كاركردن لەگەڵ ناوەندەکە. لەبەرامبەردا ناوەندی بێرمینگهام ئامادەیی خۆیان نیشاندا، كە هەماهەنگی یانەكەیان بكات و لە هەوڵی بەدەستهێنانی سەرچاوەی دارایی بێت بۆ یانەكەیان لەرێگای بەردەستكردنی سپۆنسەر بۆ یانەكان و برەو دان بە توانا و وزەی وەرزشوانان.