سەرچاوە سیاسییە عێراقییەکان ئاشکرایان کرد، کە محەمەد رەزا سیستانی کوڕە گەورەی مەرجەعی باڵای شیعە، لەسەر هێڵە بۆ بەرگرتن لە ئەگەری پێکدادانی هێزە شیعەکان و بارودۆخی سیاسی و، ئەمنی عێراقیش چاوەڕوانی كۆبوونەوەیەكی لایەنە ناكۆكەكان دەكات لە شاری نەجەف.
ئەمڕۆ سێشەممە 19ی تشرینی یەکەمی 2021، چاپی لەندەنی ڕۆژنامەی ئەلعەرەب و شەرقولئەوسەت، نووسیویانە، کە محەمەد ڕەزا سیستانی، لە چەند ڕۆژی ڕابردوودا پەیامی بۆ سەرجەم لایەنەکان ناردووە، کە دیدارێک ڕێكبخات لەسەر ئاستی باڵا، بۆ بەرگرتن لە ئەگەری پێکدادان و بەریەککەوتنی لایەنە ناكۆكەكانی شیعە.
سەرچاوەکان ئاماژەیان بەوەشکردووە، ئامانج لە هەوڵەکەی محەمەد ڕەزا ئەوە نییە، کە بگەنە هاوپەیمانێتییەکی هاوبەش، بەڵکو بەهۆی ئەوەیە، کە ئەم ڕۆژانەی دوایی گرژی و هەڕەشە و ئەگەری پەنابردن بۆ شەقام و ڕەتکردنەوەی ئەنجامەکانی هەڵبژاردن و، هەڕەشەکردن باڵی کێشابوو بەسەر پارێزگاكانی نێوەڕاست و باشووری عێراق، ئەمەش جۆرێک لە نیگەرانی درووست کردووە و ئەگەری هەڵگیرسانی شەڕی نێوخۆی لێدەکرێت، بۆیە مەرجەعییەت هاتووەتەسەر خەت.