ئەمڕۆ سێشەممە، ئیسرائیل، ئێرانی بەوە تۆمەتبارکرد، کە هێرشی کردووەتە سەر ئامانجە دەریاییەکانی لە بنکەکانی دوورگەکانی شەشبەر و قەشم، ئەو شوێنانەش بۆ هەڵگرتنی فڕۆکەی بێفڕۆکەوان بەکارهاتوون.
بێنی گانتز، وەزیری بەرگری ئیسرائیل، لە میانەی لێدوانێکی تەلەفزیۆنیدا و لە کۆنفرانسێکی ئەمنیدا، کە لە لایەن زانکۆی ڕیچمان لە تەلئەڤیڤ میوانداری کرا، ئێرانی بە هێرشەکانی سەریان تاوانبار کرد.
هەر ئەمڕۆ سێشەممە، نەفتالی بنێت، سەرۆکوەزیرانی ئیسرائیل، جەختی لەوەکردەوە کە ئیسرائیل لایەنێک نییە و نەبەستراوە بە ڕێککەوتنە ئەتۆمییەکەی ئێران، پێگەیشی لەسەر نەگۆڕاوە.
بینێت، لە گوتارێکدا لە کۆنگرەی سیاسەتی و ئاسایشی زانکۆی ڕیچمان، ئاماژەی بەوەشدا، ئەگەر توندکردنی ڕێککەوتننامەی ناوەکیش هەبێت، ئەوان لایەنێک نین و پێوەی پابەند نابن و، بۆچوونی ئەوان لەسەر ڕێککەوتنی ناوەکی نەگۆڕاوە.